د افغانستان ملي امنیت شورا سلاکار حمد الله محب ویلي، افغانان او افغان حکومت د جګړې غوښتونکي نه دي.
محب زیاتوي، که طالبان پر جګړې ټېنګار کوي،دوی هم چمتو دي، چې له خپلې خاورې او خلکو د دفاع او ساتنې لپاره جګړې ته دوام ورکړي.
محب زیاته کړه:« د افغانستان خلک او حکومت سوله ییز حل غواړي،خو که طالبان پر جګړې ټېنګار کوي،نو بیا بله لار نه شته او موږ اړ یوو،چې جګړې ته دوام ورکړو او له خپلو خلکو دفاع وکړو. د جګړې له لارې سولې ته ورسېږو،هغه څه چې موږ یې نه غواړو.»
د ملي امنیت شوراسلاکار داسې مهال وسله والو طالبانو خبرداری ورکوي، چې دغې ډلې په تېرو دوه میاشتو کې ګڼې ولسوالۍ نېولي او تازه یې ادعا کړې ده،چې په بامیانو او لغمان ولایتونو کې یې درې نورې ولسوالۍ هم لاسته لوېدلې دي.
بل پلو د ولسي جرګې یو شمېر غړي بیا وايي، روان حالت اندېښمن کړي او پر دواړو غاړو غږ کوي، چې جګړه بس او د سولې ولاړې خبرې بیا پیل کړي.
د ولسي جرګې غړی رسول خان وايي:« یو ځل بیا موږ پر دواړو غاړو غږ کوو، چې دا وخت نور د جګړې نه دی. دا جګړه دې ودرول شي. طالبانو سره چې کومې ولسوالۍ دي، هغوی دی خپلو سیمو کې اوسېږي او حکومت دې په خپله ساحه کې اوسېږي. جنګ دې ختم کړي. ولس ته مهم ټکی دا دی،چې جنګ ختم شي.»
د ولسي جرګې غړی عجب نور منګل: « ګورئ! سیاسي معامله پر دې شوې، یوه ولسوالۍ کې چې ۴۰۰ کسان وي، ته یو زخمی او شهید ورنه کړې، ۲۰ کاله په کې اوسې، نو خامخا یوه معامله ده. د معاملې په شکل دوی شاته شول.»
د سیاسي چارو تحلیل کوونکی تواب غفوري روانه جګړه نیابتي او دوام یې یوازې او یوازې افغان وژنه بولي.
غفوري زیاتوي:« کومه جګړه چې د حکومت او طالبانو ترمنځ روانه ده، په منځ کې یې قرباني غریب ولس او د افغانستان خاوره ده. دا قرباني کېږي. نو زموږ ولس ته دا په کار ده، حکومت او طالبانو ته دا په کار دي، چې دا د سولې له لارې، د مفکورې له لارې او د یوې ښیې مشرۍ له لارې، چې یوه ښه لویه اجماع جوړه کړو او له هغې لارې سوله راوړو.»
ملي دفاع وزارت وايي، یو شمېر ولایتونو کې یې پر وسله والو طالبانو ځمکني او هوايي بریدونه پیل کړي او درانه تلفات یې ور اړولي دي.
