په هېواد کې د یوناما د ماموریت له غځېدو سره همهاله، سرپرست حکومت د امنیت شورا د دې پرېکړې هرکلی کوي.
سرپرست حکومت د هرکلي ترڅنګ په کابل کې د ملګرو ملتونو له سیاسي استازولۍ (يوناما) غواړي، چې خپل ماموریت په داسې ډول ترسره کړي، چې پايله يې د ملګرو ملتونو په شمول د ټولو افغانانو په ګټه وي.
د اسلامي امارت ویاند ذبیح الله مجاهد وايي: « موږ غواړو چې یوناما په اغېزناکه توګه افغانستان کې فعاله اوسي. د دوی اوسنی رول یوازې د راپور ورکولو دی چې دا ډېر محدود رول دی او ستونزې لري. ښه دا ده چې یوناما په افغانستان کې د افغانستان د نظام او ملګرو ملتونو ترمنځ ښه منځګړتوب وکړي.»
مجاهد زیاتوي، چې په ملګرو ملتونو کې د افغانستان څوکۍ باید سرپرست حکومت ته وسپارل شي او د افغانستان کنګل شوې شتمنۍ د ازادولو ترڅنګ دې نړيوال د ستونزې حل په موخه، پر سرپرست حکومت فشارونه او بنديزونه نه وضعه کوي.
هغه وايي: « د افغانسان پیسې ګنګل شوې او په دې کې ملګري ملتونه رول لري، باید خپل رول ادا کړي. همداراز په ملګرو ملتونو کې د افغانستان څوکۍ افغانانو ته وسپاري څو د افغانستان د خلکو استازیتوب وکړي، د افغانستان له ګټو دفاع وکړي او د افغانستان د هر وګړي غږ هلته ورسوي. بندیزونه باید له منځه لاړ شي. له نورو هېوادونو سره د افغانستان د اړیکو په ټينګښت کې باید دوی ښه رول ولوبوي، چې د دې کارونو ګټه به نېغ په نېغه افغانانو ته رسېږي او یوناما هم د ملګرو ملتونو ښه استازولي کولی شي، له دوی تمه هم همدا ده؛ نو تر دې دمه کمکاري شوې ده او موږ غواړو راتلونکي کې کال ښه فعاله اوسي.»
د سیاسي چارو کارپوهان وایي، سرپرست حکومت له هېوادونو سره اړیکو ته تر بل هر وخت اړتیا لري او یوناما کولی شي په دې برخه کې د تسهيلوونکي رول ادا کړي.
د دوی په باور ، که چېرې سرپرست حکومت او نړیواله ټولنه د یو بل غوښتنې ومني، په دې توګه به له نړۍ سره د اسلامي امارت سیاسي اړیکې پیاوړې او د حکومت رسمیت پېژندلو ته به زمینه برابره شي.
د سیاسي چارو کارپوه محمد سلیم پیګیر وايي: « داسې لارې دې غوره کړي چې افغانستان له انزوا وِژغورل شي.»
د سیاسي چارو کارپوه محمد اسلم دانشمل وايي: « زموږ هیله دا ده چې په روان ۲۰۲۴ کال یوناما د افغانستان ګوټ ګوټ ته د خپلو پرګرامونو لمن وغځوي ترڅو افغانان د دوی له مرستو او پرګرامونو ګټه واخلي.»
د سیاسي چارو کارپوه محمد زلمی افغانیار وايي: « هیلهمن یو په ۲۰۲۴ کال کې یوناما د افغانستان په سیاسي اوضاع کې لاسوهنه ونه کړي او پرېږدي چې افغانان خپله د اوسني حکومت په مشوره خپل سیاسي برخلیک وټاکي، خپل کورني موضوعات، درس، تحصیل او د علمي او فرهنګي ظرفیت لوړونې بحثونه خپله افغانان حل کړي.»
دا په داسې حال کې ده، چې د ملګرو ملتونو امنیت شورا د افغانستان په تړاو په ترسره کړې وروستۍ غونډه کې په پنځلسو موافقو رایو سره د یوناما ماموریت د یوه بل کال لپاره تمديد کړ.
یوناما د ملګرو ملتونو ځانګړی سیاسي ماموریت دی، چې د ۲۰۰۲ کال د مارچ پر ۲۸ مه د ياد سازمان د امنیت شورا له خوا د ۱۴۰۱ پرېکړه لیک له مخې تاسیس شو.
