که څه هم له تېرو څلورو کلونو راهیسې اسلامي امارت په کراتو ویلي چې د امریکا په شمول له ټولو هېوادونو سره رغنده اړیکې غواړي او د نړۍ له هېوادونو يې غوښتي چې د اوسني حکومت پر وړاندې دوښمنانه سیاست پایته ورسوي او پر رسمېت یې وپېژني.
د اسلامي امارت ویاند ذبیح الله مجاهد له شمشاد سره ځانګړې مرکه کې وایي، اوس مهال په دوحه کې د اسلامي امارت او امریکایي چارواکو ترمنځ د اړیکو پیاوړتیا، سفارت پرانېستلو، او بندیانو تبادلې په تړاو خبرې روانې دي او هیله ښیي چې امریکا به هم له افغانستان سره خپلې اړیکې نورمال حالت ته راولي.
د مجاهد په خبره، که چېرې امریکا په کابل کې سفارت پرانیزي ډېری ستونزې به هوارې او د هېوادونو له لورې به اسلامي امارت پر رسمېت وپېژندل شي.
هغه زیاته کړې:« افغانستان او امریکا وخت پر وخت ناستې درلودلي دي، د بندیانو موضوع باندې خبرې لرلې او هیله من دې ته یو چې امریکا په افغانستان کې خپل سفارت پرانیزي، دا به د ډېرو ستونزو د حل یوه کیلي شي، ځکه سوی تفاهم به له منځه ولاړ شي. د نورو هېوادونو باور به هم زیات شي، خپله امریکا هم یو لوی هېواد دی، افغانستان کې به د پانګونې لپاره زمینه برابره کړي، دلته به پرمختګونه له نږدې وویني.»
ذبیح الله مجاهد وایي، افغانستان د امریکا په ګډون له ټولو هېوادونو سره د ښو اړیکو غوښتونکی دی.
مجاهد زیاتوي، دمګړۍ اسلامي امارت له ډېرو هېوادونو سره رسمي تعاملات لري او له هېوادونو غواړي چې له ځنډ پرته دې اسلامي امارت پر رسمېت وپېژني.
هغه په دې اړه وايي:« دا هم چې له هېوادونو سره زموږ تنشونه له منځه ولاړ شي. له موږ سره ډېر هېوادونه تعامل لري، خو اعلان یې نه دی کړی، خدای دې ورکړي چې دا جرأت په کې پيدا شي چې ټول هېوادونه ښکاره اعلان وکړي، لکه روسیې چې وکړ. په هر صورت افغانستان هیله من د ښو اړیکو او رسمیت پېژندنو دی او له دې سره سره چې تعاملات رسمي دي، دا باید په اعلان کې هم راشي. دا د ټولو اړخونو لپاره ګټه هم کوي.»
ذبیح الله مجاهد ټېنګار کوي چې د نړیوالې ټولنې او غربي هېوادونو سیاسي فشارونه پایله نه ورکوي او په خبره یې د فشارونو پر ځای دې د اسلامي امارت پر چارواکو د سفر بندیزونه لرې کړي.
د اسلامي امارت ویاند خبرداری ورکوي چې اسلامي امارت او افغان ولس هېچا ته د بګرام د نېونې اجازه نه ورکوي.
