د اسلامي امارت ویاند «حکومت د مطبوعاتو په هنداره کې» پروګرام ته انلاین مطبوعاتي ناسته کې د معلوماتو وړاندې کولو پرمهال، د یوشمېر نورو ادارو ترڅنګ، د کار او ټولنیزو چارو وزارت، کابل ښاروالۍ او افغان پوست امارتي شرکت د ۱۴۰۴ هجري کال لاسته راوړنې تشرېح کړې.
ذبیح الله مجاهد وویل چې نږدي ۶۳ زره کسانو ته کاري فرصتونه، د کاري فرصتونو د بهیر چټکتیا لپاره د برېښنايي سیسټم ایجادول او په زونونو کې دې برخې ته د استازولیو زیاتول، د کار او ټولنیزو چارو وزارت عمده لاسته راوړنې دي.
د اسلامي امارت ویاند وايي: « په ۱۴۴۷ هجري قمري کال کې کورنیو او بهرنیو وګړو ته، ۶۲ زره ۷۳۹ د کار جوازونه وېشل شوي دي. د لا زیاتو اسانتیاوو رامنځته کولو لپاره د جوازونو د وېش بهیر برېښنايي شوی او په زونونو کې د وېش استازولۍ جوړې شوې دي.»
ذبیح الله مجاهد د کابل په ۲۲ ناحیو کې د نږدې ۱۴ زره بېلابېلو توکو پلورونکو یا صنفونو ته د فعالیت اجازه لیکونو ورکړه، د بې جوازه صنفونو پېژندل او دغه راز نږدې ۵ زره نورو صنفونو ته له نرخنامو څخه د سرغړونې له امله د فعالیت لنډ مهاله ځنډ او سپارښتنې، د کابل ښاروالۍ مهمې لاسته راوړنې بللي.
د نوموړي په خبره، کابل ښاروالۍ په ۱۴۴۷ هجري قمري کال کې د بازار د تنظیم او ښاري نظم په موخه د کابل ښار بېلا بېلې سیمې له لاس پلورونکو پاکې کړې دي.
ذبیح الله مجاهد په دې اړه وايي: « د بازارونو د تنظیم او ښاري نظم په موخه، د کابل ښار ګڼ مېشت ځایونه له لاس پلورونکو څخه پاک شوي دي. ۱۳ زره ۹۷۰ مختلفو اصنافو ته د کابل ښار په ۲۲ ناحیو کې د فعالیت اجازه صادره شوې، ۳ زره ۹۳۳ غیر جواز لرونکي اصناف پېژندل شوي، فعالیتونه یې لنډمهاله ځنډول شوي او سپارښتنې ورته شوې دي.»
د اسلامي امارت ویاند دغه راز وايي، کابل ښاروالۍ په ۱۴۴۷ قمري کال کې د ښاري زرغونتیا لپاره له ۵۰۰ زره زیات نوي نیالګي او زینتي بوټي کېنولي او هم یې د اوبو لګولو سیسټمونو چارې تنظیم کړې دي.
ذبیح الله مجاهد د کثافاتو راټولونه، د لویو کانالونو او ویالو پاکونه هم د کابل ښاروالۍ د تنظیفي برخې د فعالیتونو عمده لاسته راوړنې بولي.
د حکومت ویاند د افغان پوسټ شرکت د لاسته راوړنو تشرېح کولو پرمهال وویل چې د ۱۴۴۷ هجري قمري کال په درشل کې افغان پوسټ دولتي شرکت په کوردننه څه باندې ۵ میلیون مراسلات او بهرنیو هېوادونو ته د نږدې ۶ زره بستو لېږد ترسره کړی.
د مجاهد په خبره، په مراسلاتو کې نږدې ۳ میلیون یې دولتي او څه باندې ۲ میلیون یې شخصي دي.
د اسلامي امارت ویاند زیاتوي: « افغان پوسټ شرکت په هېواد کې د ننه ۵ میلیونه ۲۸ زرو څخه زیاتو مراسلاتو او بهرنیو هېوادونو ته دې ۵ زره ۸۵۳ بستو د لېږد زمینه برابره کړې ده. دا د پوسته رسونې په برخه کې لوی پرمختګ دی.»
مجاهد حکومت د مطبوعاتو په هنداره کې پروګرام ته دغه راز ویلي چې اقتصاد وزارت په تېرکال کې ۸۴ کورنیو او ۲ بهرنیو موسسو ته د کار جواز ورکړی او دغه راز یې۱۴۰ زره کاري فرصتونه رامنځته کړي دي.
ذبیح الله مجاهد وايي: « په هېواد کې د نا دولتي موسسو د فعالیتونو تنظیمولو په موخه، په ۱۴۴۷ کال، ۸۴ کورنیو موسسو او دوو بهرنیو موسسو ته چې د روغتیا، کرنې، اوبو لګولو، مالدارۍ، معارف او بشري مرستو په برخو کې فعالیت کوي، د فعالیت جوازونه ورکړل شوي دي.»
د افغان پوسټ امارتي شرکت خلکو ته د لا غوره خدمت کولو په موخه د عادي او بېړنیو خدمتونو څانګې رامنځته کړې دي چې د کور دراوزې ته د رسولو خدمت یې هم یوه برخه ده.
