د ملي دفاع وزیر ملا محمد یعقوب مجاهد له بيبيسي سره مرکه کې چې پر خوست او ننګرهار د پاکستان له هوايي بريدونو وړاندې يې کړې او تازه خپره شوې ويلي، پاکستان تر خپل کنټرول لاندې سيمو کې د ناامنيو په مهارولو کې پاتې راغلی دی.
د مجاهد په خبره، دغلته بريدونه له ډيورنډ فرضي کرښې سلګونه کيلومتره لرې کېږي او ورته له افغانستان سره تړاو ورکول منطقي نه دي.
مجاهد په دې اړه د پاکستان تورونه د دې هېواد د ځواکونو کمزوري يادوي چې په خبره يې د افغانستان په تورنولو کې يې د پټولو هڅه کوي.
هغه په دې اړه وايي:« که ټي.ټي.پي او که بلوڅان دي، دوی چې عملیات کې کوي، د پاکستان منځ کې یې کوي، په لویو لویو ښارونو کې یې کوي او له ډیورنډ کې کرښې په سلګونه کیلومتره دننه په پاکستان کې یې کوي، نو دا چې دا له افغانستانه ورځي او بیا په سلګونه کیلومتره دننه تېرېږي، دلته یې ولې مخه نه نیسي. که هلته یو موټر بم کېږي، که هدفې وژنې کېږي، که چاودنې کېږي، هلته باید د دې مخه ونیسي. زما په فکر دا د دوی د امنیتي ادارو ضعف دی او د خپل ضعف د پټلو لپاره دوی پر افغانستان باندې تورونه لګوي.»
د سیاسي چارو شنونکي په قبايلي سيمو، خيبرپښتونخوا او پاکستان کې روان ناسم امنیتي، سیاسي او اقتصادي وضیعت د دغه هېواد د هغو ناسمو سیاستونو او پالیسو محصول ګڼي چې د دوی په ټکو له تېرو نږدې ۸ لسیزو راهیسې یې د ترهګرۍ تمويل او تجهيز له لارې تعقیبوي.
د سیاسي چارو شنونکی ادریس محمدي ځاځی وايي:« پاکستان یو ثبوت هم نه دی وړاندې کړی چې د دوی په هېواد کې دا شته ګواښونه د افغانستان له خاورې دي یا افغانستان دا هڅه کوي چې ګاونډیان یې نا امنه شي. زما په اند باندې دا خبرې باید د حکومتونو پر سطحه حل شي، نه باید د دې قربانیان عام ولس شي او یو هېواد بل هېواد تر تعارض لاندې راولي یا پر نړیوال ستیج د هغه د بدنامولو هڅه وکړي.»
د ملي دفاع وزیر د خپلې مرکې په يوله بله برخه کې په افغانستان کې د وسله والو ډلو موجوديت په اړه ادعاوو ته هم تم شوی او په بشپړه توګه د داعش مهوه کېدو ادعا ترڅنګ يې ډاډ ورکړی چې په افغانستان کې نورو هېوادونو ته ګواښمنې ډلې حضور نه لري.
مجاهد په دې اړه وايي:« الحمد الله په افغانستان کې د داعش جرړه ایستل شوې، داعش په ټول افغانستان کې، یوازې داعش نه بلکې بلکې هېڅ داسې یوه ډله چې د افغانستان امنیت ته ګواښ وي، یا له افغانستانه نورو هېوادونو ته ګواښ جوړولی شي، په افغانستان کې شتون نه لري.»
له هغې وروسته چې په پاکستان او د دغه هېواد تر کنټرول لاندې سيمو کې د بلوڅ بیلتون غوښتونکو او ټي.ټي.پي له لوري جګړې شدت موندلی، پاکستان تل پر افغانستان تور پورې کړی چې ګنې وسلهوال يې له خاورې ور اوړي.
خو د افغانستان حکومت د دې ادعاوو ردولو ترڅنګ په مکرره توګه ډاډ ورکړی چې له خاورې يې هېچا ته ګواښ متوجې نه دی.
