د ملي دفاع وزیر ملا محمد یعقوب مجاهد له مسکو څخه کابل ته له نوو ژمنو سره راستون شو او ښايي له همدې امله وي، چې پر افغانستان د پاکستان هوايي بريدونو مخنيوی حتمي بولي.
نوموړی د کابل او مسکو ترمنځ د امنيتي همکاريو له تړونه پاکستان پر افغانستان راتلونکو بريدونو مخنيوي په اړه ويرېدلی بولي او په خبره يې له همدې امله يې بهرنيو چارو وزير له امريکايي چارواکو سره د افغانستان په اړه اندېښنې شريکې کړې.
مجاهد څرګنده کړې:«پاکستان چې دا شکایت کړی دی کېدی شي هغه له دې وېره لري، لکه تاسې چې ولېدل، څو میاشتې مخکې دوی ښه په جرات کولای شوی چې د افغانستان پر هره برخه باندې بمبارد وکړي. موږ په دې هڅه کې یو چې په نږدې راتلونکې کې نور دوی( پاکستان) دا جرات ونه کړی شي.»
د مسکو او کابل ترمنځ د امنيتي همکاريو تړون روسيې ته د ملا محمد يقوب مجاهد د سفر په لړ کې لاسليک شو او له مخې به يې، په افغانستان کې موجوده روسي الوتکې او نور پوځي تجهيزات بيا ترميم شي.
د ملي دفاع وزير دغه تړون په پوځي برخه کې لاسته راوړنه او له هر ډول تشويش خالي بولي.
هغه په دې اړه وايي:« دا یو نظامي او تخنیکي توافقنامه ده چې د دې برخې پوهان پرې پوهېږي، دا نه یو دفاعي تړون دی او نه یو امنیتي تړون دی چې څوک ترې تشوېش وکړي. دا به یوازې او یوازې د افغانستان د ګټو لپاره وي. تاسو وینئ چې په افغانستان کې ډېر روسي تخنیک په نظامي برخه کې شتون لري، هلېکوپټر او نورې الوتکې ، تجهیزات او وسلې په بېلابېلو برخو کې، نو هغه ترمیم ته اړتیا لري، پرمختګ ته اړتیا لري، څار او نظارت ته اړتیا لري.»
ملا يعقوب له روسيې سره د شوي تړون په نتيجه کې رامنځته کېدونکي پرمختګونو د سيمهييز امنيت ټينګښت په ګټه يادوي او زياتوي، چې په افغانستان کې د پاتې امريکايي تجهيزاتو د بيا ترميم لپاره هم له هر هغه هېواد سره ورته تړون ته چمتوو دي، چې په دې برخه کې له افغانستان سره همکارۍ ته لېوالتيا لري.
هغه زیاته کړې:« ځینې هېوادونه بې ځایه تشوېش کوي. زموږ پالیسي دا ده چې افغانستان د نړۍ د هېڅ هېواد لپاره خطر نه دی، بلکې زموږ دا پرمختګونه په نظامي برخه چې کې راځي، هغه به د دې لپاره ګټور تمام شي چې په سمیه کې له امنیت سره همکاري وکړي، پاتې شو داسې تړونونه چې دي، موږ دلته امریکايي ساخت طیارې هم لرو، برازیلي هم لرو، د ډېرو هېوادونو لرو. نو کېدی شي موږ اړتیا پیدا کړو چې هغوی لېوالتیا ولري، له هغوی سره هم داسې تړونونه ولرو، موږ په دې کې کومه ستونزه نه لرو. »
