له هېواده بهر او په خواله رسنیو کې د نسل وژنې کمپاینونه پيل شوي او پر اسلاميامارت تور پورې کوي چې یو خاص قوم یې ځپلی دی.
دغه کمپاینونه چې ځېنو بهرنیو رسنیو کې ورته ځانګړې برنامې وقف شوي ادعا کوي، چې اسلامي امارت په هېواد کې له قومي او مذهبي لږکیو سره دوه ګونی چلن کوي او په سیستماتیک ډول هزاره وژنه روانه ده.
خو د اسلامي امارت ویاند ذبیح الله مجاهد دا ادعاوې او تورونه په کلکه ردوي او وایي، په افغانستان کې د قومي او مذهبي لږکیو پر وړاندې هېڅ راز تبعیض نشته او په دې تړاو ادعاوې د بهرنیو کړیو او داخلې ناکامو څېرو دسیسې بولي.
هغه زیاتوي: « له افغانستانه تښتېدلي لاهم له هېواد سره د دوښمنۍ په فکر کې دي، لاهم اختلافاتو ته لمن وهي او له بې اتفاقیو خوند اخلي. افغانستان اوس بدل دی، دلته ثبات دی، امنیت دی او هېڅ ډول تبعیض ته اجازه نه ورکول کېږي. هزاره، ازبک او پښتون وروڼه یو د بل ترڅنګ په خوښۍ ژوند کوي، د هېڅ چا پر حقونو تېری نه کېږي، دقیق او حقیقي دریځ دا دی چې اسلامي امارت تبعیض نه مني.»
په ورته مهال د سیاسي چارو شنونکي بیا له هېواده بهر د هزاره نسل وژنې په هکله پیل شوي کمپاینونه د هغو داخلې او بهرنيو کړیو کار بولي چې په افغانستان کې ناکامه څېرې پاته شوي دي.
د سیاسي چارو شنونکی غلام حسین هزاره وايي: « له هزاره او شعیه مذهبو سره د اسلامي امارت د مسوولینو او مجاهدینو چلن اسلامي، افغاني، اخلاقي او مسوولانه دی، دا یو ډول تبلیغات دي چې ګوندې له هزاره وروڼو سره ظلم کېږي او نسل وژنه کېږي او یا ورسره د اسلامي امارت د مجاهدینو له لوري ظلم زیاتی کېږي؛ دا ټولې له حقیقته لرې خبرې دي.»
ځینې نور بیا پر اسلامي امارت غږ کوي چې د داسې کړیو او دسیسو پر وړاندې جدي اقدامات وکړي او چاته اجازه ورنه کړي چې د افغانانو فکرونه مخشوش کړي، شته یووالی زیانمن کړي او خپلو شومو اهدافو ته ورسیږي.
د سیاسي چارو شنونکی ذاکراالله هاشمي وايي:« په افغانستان کې موږ ګورو، الحمدالله د قومونو ترمنځ په یوه ښه فضاء کې ژوند روان دی، حکومت خپل خدمات په مساوي توګه وړاندې کوي، په دشت برچي کې هم سړکونه جوړېږي، روغتونونه جوړېږي او ورته څرګنده ده چې دا هر څه تبلیغات دي او زما په نظر د غرب د استخبارتي کړیو کار دی.»
واک ته د اسلامي امارت له رسېدو وروسته دا دویم ځل دی چې د نړۍ په ځېنو هېوادونو او ټولنیزو رسنیو کې په پراخه کچه د هزاره او شعیه مذهبو د وژنې مخنیوي په نوم کمپاین ترسره کېږي او پر اسلامي امارت تور پورې کوي چې له مذهبي لږکیو یې ازادي اخېستې او هزاره قوم یې ځپلی دی.
خو اسلامي امارت دغه کمپاینونه د بهرنیو افغان دښمنه کړیو کار بولي او خبرداری ورکوي چې هیچاته به اجازه ورنه کړي چې افغانستان کې د مېشتو قومونو ترمنځ نفاق او بېثباتي رامنځته کړي.
