وروسته له هغې چې اسلامي امارت واک ته رسیدلی، په جوماتونو ، خانقاوو، دیني عالمانو او پر ولسي وګړو ګڼ بریدونه ترسره شوي دي.
تازه د ملي دفاع وزارت سرپرست ملا یعقوب مجاهد وايي، په دغو بریدونو کې د پاکستاني او تاجکستان هېوادونو وګړو لاس درلود.
مجاهد چې د کلني امنيتي راپور وړاندې کولو پرمهال يې د خبریالانو پوښتنې ځوابولې وايي، ځواکونو یې د عملیاتو پرمهال لسګونه تاجکي وران کاري وژلي او لسګونه نور یې ژوندي نیولي دي، چې په بریدونو کې یې لاس درلود .
ملا یعقوب وايي، همداراز په دې تړاو له ۲۰ زیات پاکستاني وګړي چې په افغانستان کې بریدونه ترسره کول وژلي دي او سلګونه نور یې ژوندي نیولي دي .
د نوموړي په خبره، په دې تړاو چې دغه وګړي د تاجکستان او پاکستان اتباع دي، کره شواهد لري.
مجاهد زیاتوي: « د اسلامي امارت واک ته له رسېدو وروسته چې افغانستان کې پر جوماتونو، خانقاوو، دیني علماوو کرامو او عامو وګړو کوم بریدونه ترسره شوي په هغو ټولو کې د بهرنیو اتباعو په ځانګړې توګه د تاجکستان هېواد له اتباعو کار اخېستل شوی، لسګونه تاجکستاني اتباع زموږ د امنیتي ځواکونو د عملیاتو په پایله کې وژل شوي او لسګونه نور یې ژوندي نیول شوي دي. همداراز په دویمه درجه کې د زیاتو بریدونو په تنظیم کې پاکستاني اتباع ښکېل وو. له ۲۰ زیات پاکستاني وګړي زموږ د امنیتي ځواکونو په عملیاتو کې وژل شوي او سلګونه نور یې ژوندي نیول شوي دي. تاجکستاني او پاکستاني اتباع چې دلته نیول شوي یا بريدونو کې ښکېل وو یا یې د بریدونو په تنظیم کې لاس درلوده؛ په دې اړه شواهد شته، البته موږ دا نه وایو چې په دې کې به د دوی حکومتونه هم ښکېل وي او یا نه؛ خو دا یو حقیقت دی چې اتباع یې دلته په بریدونو کې لاس لري.»
د ملي دفاع وزارت سرپرست خبرداری ورکوي چې د اسلامي نظام پر وړاندې راپورته کېدل بغاوت دی او که هر څوک په بغاوت لاس پورې کړي، نو د امنیتي ځواکونو له لوري به له منځه يووړل شي.
هغه زیاته کړه: « د هېواد په هره سیمه کې زموږ امنیتي ځواکونه دوښمن ته د هېڅ ډول برید فرصت نه ورکوي. د قران کریم د صریح آيت او مبارکو حدیثونو له مخې د زرګونه تنو علماو فتوا او پرېکړه ده، چې د اسلامي نظام پر وړاندې هر ډول نظامي حرکت بغاوت ګڼل کېږي او هر هغه څوک چې د اسلامي نظام پر وړاندې بغاوت وکړي؛ نو زموږ مجاهدین به یې له منځه وړي.»
ملایعقوب مجاهد د پاکستان ټولې هغه ادعاوې چې ګني تحریک طالبان پاکستان په افغانستان کې پټڼ ځایونه لري په کلکه ردې کړې او زیاته کړه، چې ټي.ټي.پي په افغانستان کې هیڅ مرکز اوحضور نه لري .
هغه زیاتوي: « ټي.ټي.پي مرکزونه چې دلته موجود دي او په اړه یې دوی ادعا کوي، موږ دا په کلکه ردوو او دا چې په دې تړاو دوی زموږ یا د افغانستان په مقابل کې کومې ادعاوې لري بې ځایه او بې بنسټه دي.»
په دې وروستیو کې پاکستان کې بریدونه زیات شوي دي او پاکستاني چارواکي د دغو بریدونو پړه پر افغانستان اچوي او ادعا لري چې د ټي.ټي.پي.غړي له افغانستانه وراوړي ، هغه څه چې اسلامي امارت تل رد کړي او زیاته کړې یې ده چې د ټي.ټي.پي مسله د پاکستاني داخلي ده او باید پر افغانستان ونه تپل شي.
