له هغې وروسته چې په پاکستان کې ناامني او بریدونه زیات شوي دي اسلام اباد له کابل سره ښې اړیکې نه پالي او د خپلو ملامتیو پړه پرافغانستان اچوي.
د کابل او اسلام ترمنځ ناسمې اړیکې هغه مهال بیخي ترینګلې شوې چې کله پاکستاني پوځیانو د افغانستان پر خاوره هوايي بریدونه وکړل.
اوس هڅې پیل شوي چې دغه ستونزې د خبرو له لارې حل شي.
د اسلامي امارت ویاند ذبیح الله مجاهد وايي، د خبرو له لارې له ټولو سره د ستونزو حل غواړي او له اسلام باد سره د وروستیو پیدا شویو مسایلو په تړاو هم پر خبرو ټینګار لري.
ذبیح الله مجاهد شمشاد ته وویل، په همدې موخه یې اسلام اباد کې د افغانستان شارژدافیر د افغانستان لپاره د پاکستان له ځانګړي استازي اصف دراني سره لیدلي دي.
مجاهد زیاتوي: « افغانستان تل د ستونزو په حل ټينګار کړی او پلوی یې دی. تېره ورځ د اسلامي امارت سفیر په اسلام اباد کې د افغانستان لپاره د پاکستان له ځانګړي استازي سره لیدلي و او په خبرو کې پاکستاني لوري ته دا خبره تصریح شوې ده چې موږ د حل او د ستونزو د له منځه وړلو پلوي یو، په خبرو باور لرو او هېوادونه باید د یو بل حریم ته درناوی ولري، داسې کړنې ترسره نه شي چې بیا وروسته پېښماني ولري؛ نو موږ هم د ستونزو د هواري لپاره په خبرو تمرکز کوو او باید هره ستونزه د خبرو او ناستو له لارې هواره شي.»
په اسلام اباد کې د افغانستان شارژدافیر سردار احمد شکیب او د پاکستان له ځانګړي استازي اصف دراني سره په لیدنه کې پر دې هوکړه شوې، چې په راتلونکي کې به داسې پېښې نه تکرارېږي چې د دواړو هېوادونو ترمنځ د ستونزو د پیدا کېدو لامل کېږي.
په دغه لیدنه کې د دواړو هېوادونو ترمنځ د سوداګرۍ په برخه او سیاسي اړیکو هم خبرې شوې.
شکیب وايي: « د پاکستان د وروستیو بمباریو په پایله کې چې کومې ستونزې رامنځته شوې، د دې په اړه داسې هوکړه وشوه چې په راتلونکي کې به داسې پېښې بیا نه تکرارېږي، دواړه حکومتونه او هېوادونه به په دې تړاو په ګډه کار وکړي. همداراز سوداګرۍ، د خلکو تګ او راتګ او کډوالو په اړه هم یوه مثبت تعامل ته باید سره ورسېږو او ګډ کار وشي څو د خلکو ستونزې له منځه لاړې شي او ژوند یې متاثره نه شي.»
د سیاسي چارو کارپوهان وايي، پاکستان ته هم په کار وه چې د برید پرځای یې مساله د خبرو له لارې مطرح کړې وای او په خبره یې اوس هم وخت شته باید ستونزې د ډیپلوماټیکو چینلونو له لارې حل شي.
د سیاسي چارو کارپوه شهزاده مسعود وايي: « څه موده وړاندې ځېنې ستونزې پیدا شوې او له بده مرغه زموږ په ملي حاکمیت تېری وشو، چې دا د حل لاره نه وه او باید د ډيپلوماټیکو لارو ستونزه هواره شوې وه. موږ هیله لرو چې له دې وروسته هم چې هره ستونزه پیدا کېږي ښه او معقوله لار یې ډيپلوماټيکه او د خبراترو لار ده او له همدې لارې باید هره ستونزه هواره شي.»
د افغانستان لپاره د پاکستان ځانګړي استازي اصف دراني سره په اسلام اباد کې په داسې حال کې لیدنه ترسره کېږي، چې نوموړي د خوست او پکتیکا له بریدونو وړاندې تور پورې کړی و چې په افغانستان کې له پنځو ترشپږو زرو ټيټيپي وسله وال اوسېږي او کره شواهد په واک کې لري چې دغو جنګیالیو ته له هند پیسې راځي.
