د ایران ولسمشر ابراهیم رئیسي د جنازې مراسم د سه شنبې پر ورځ د ( ۱۴۰۳ کال د غبرګولې پر لومړۍ) پیل شوي، چې له پنځه ورځني ملي ماتم وروسته به یې جسد خاورو ته وسپارل شي.
د ایران دولتۍ رسنيو د راپور له مخې، د نوي ولسمشر ټاکلو لپاره به ټاکنې د جون پر ۲۸ مه ترسره شي.
د افغانستان اسلامي امار ویاند ذبیح الله مجاهد، چې د ایران ولسمشر ابراهیم رئیسي پر مړینه یې خواشیني څرګنده کړې وايي، له ایران سره یې متقابلې اړیکې له پخوا ښې دي او په راتلونکي کې هم له دې هېواد سره د ورته اړیکو غوښتونکي دي.
مجاهد زیاتوي: « افغانستان له ایران سر ښې اړیکې غواړي او هیله لرو چې هلته کوم حکومت ټاکل کېږي افغانستان سره به ښې اړیکې ولري او همداسې به ښو اړیکو ته دوام ورکوو.»
له دې سره د سیاسي چارو یو شمېر کارپوهان وايي، له افغانستان سره د ایران اړیکې د دغه هېواد د مذهبي مشرانو له لوري ترتیب او تعقيبېږي.
د دوی په خبره چې له څه باندې ۴۰ کلونو راهیسې هېڅ ډول بدلون نه په کې راغلی نه دی.
د سیاسي چارو شنونکی خلیل احمد نادم وايي: « د ایران اسلامي جمهوري سیاست د افغانستان په هکله د ۱۳۵۸کال راهیسې هېڅ بدلون نه دی موندلی. هر ولسمشر چې وي سیاست هماغه سیاست دی چې د دوی مذهبي رهبر یې وړاندې کوي.»
خو ځېنې نور بيا پر دې باور دي، چې د ايران سرپرست ولسمشر د دغه هېواد په بهرني سياست کې د تغیير رامنځته کولو واک نه لري او د موجوده پالېسيو تعقيب او تطبيق يې لوی ماموريت دی.
د سیاسي چارو شنونکی عزيز معارج وايي: « د ایران سرپرست ولسمشر ډېر واک او اختیار نه لري او کومه پالېسي چې دی مخې ته بیایي دا به هماغه پالېسي وي چې مخکې جوړه شوې ده. د ایران بهرنی سیاست د سیمې، نړۍ او ګاونډ په کچه هماغه یو سیاست دی چې دا به مخې ته بیایي؛ نو که طالبان کومې غوښتنې لري ایران په هغې کې کوم بدلون نه راولي، دا یوازې یو لنډمهاله ولسمشر دی چې تر ۵۰ ورځو یا دوو میاشتو به ناست وي؛ اسلامي امارت به لکه مخکې خپلې پالېسۍ ته دوام ورکړي او ایران هم د خپلې مخکېنۍ پالېسۍ پر بنسټ خپلو اړیکو ته دوام ورکوي.»
د سیاسي چارو کارپوهان له سرپرست حکومته غواړي، چې د ایران له نوې رهبرۍ سره د اړیکو پر تقویت داسې تمرکز وکړي، چې د ملي ګټو خوندیتوب ته په کې ځانګړی پام شوی وي.
د سیاسي چارو شنونکی ادریس محمدي ځاځی وايي: « اسلامي امارت باید له نوي ولسمشر سره د هغه د ایډیالوژۍ سره سم، چلن وکړي، څو هغه چې اړیکې تر دې دمه رارسېدلي زیانمنې نه شي او راتلونکي کې چې کومې اړیکې له نوي ولسمشر سره جوړېږي هغه خرابې نه شي.»
د ایران ولسمشر ابراهیم رئیسي، د بهرنیو چارو وزیر حسین امیرعبداللهیان او یو شمېر نور چارواکي د یکشنبې پر ورځ هغه مهال مړه شول، چې چورلکه یې په ختیځ اذربایجان کې ناڅاپي نسکوره شوه.
د ابراهیم رئیسي له مړینې وروسته د دغه هېواد دولتي رسنیو خبر ورکړ، چې د نوموړي پر ځای د هغه مرستیال محمد مخبر د سرپرست ولسمشر په توګه ټاکل شوی دی.
