په داسې حال کې، چې د نوي مالي کال له پيل ۱۲ ورځې تېرې شوي، خو لا هم د سرپرست حکومت له لوري ملي بوديجه نه ده توشيح شوې.
د اسلامي امارت ویاند ذبیح الله مجاهد وايي، د ماليې وزارت له لوري د ملي بودیجې طرحه بشپړه شوې او د يو لړ بنسټيزو پروژو د تطبيق لپاره، پراختيايي بوديجې ته په کې د تېرو کلونو پرتله زيات تخصيص ورکړل شوی دی.
نوموړی که څه هم د ملي بوديجې د ټولهييز مالي ارزښت په اړه څه نه وايي، خو زياتوي چې په کې عادي بوديجه په خپل حال ده او په حجم کې يې بدلون نه دی راغلی.
مجاهد زیاتوي: « دا چې کال نوی شوی دی، په نږدې راتلونکي کې به بودیجه هم تائید شي او د عملي چارو لپاره به ارګانونو ته په اختیار کې ورکول شي. د بودیجې جزئیات چې څومره پلانونه د پرمختګ لپاره لري او څومره عادي ده، دا به ان شاءالله په خپل وخت د مالیې وزارت تشریح کوي او له رسنیو سره به یې شریک کړي؛ خو دومره ویلی شم چې د افغانستان اسلامي امارت د سږکال لپاره ګڼ پراختیايي پلانونه لري چې د دې لپاره به هم بودیجه وي او هم چمتوالی، ترڅنګ یې عادي بودیجه هم په خپل پخواني حالت ټاکل شوې، حکومت یو میلیون او څلوېښت زره مامورینو ته چې معاشونه اخلي، تېر کال هم پر وخت معاشونه رسولي او له دې وروسته به هم ورسېږي او دا پروسه به روانه وي. موږ هیله من یو چې د پراختیايي بودیجې په برخه کې د تېر کال پرتله زیات پراختیايي پرګرامونه موجود وي.»
د اقتصادي چارو کارپوهان بيا ټينګار کوي، چې سرپرست حکومت دې د مسووليت په منلو سره د ملي بوديجې طرحه له ولس سره شريکه کړي.
د دوی په خبره، په ياده طرحه کې د ولايتونو ترمنځ د انډول تامين مهم دی او اړتيا ده، چې دې اصل ته جدي پاملرنه وشي.
د اقتصادي چارو کارپوه شاکر یعقوبي وايي: « د افغانستان اقتصادي وضعیت ته په کتو لومړیتوبونه ته ډېره جدي اړتیا ده،چې باید په بودیجه کې په پام کې ونیول شي.»
د اقتصادي چارو کارپوه زلمی افغانیار وايي: « هیله من یو چې د ۱۴۰۳ کال بودیجه ژر توشیح شي او هر وزارت د خپلو پراختیايي پرګرامونو پر بنسټ وکولی شي خدمات رسول مدیریت کړي. تر هغې چې دا مشخصه نه شي چې د هر وزارت بودیجه څومره ده نو دا طبیعي ده چې ستونزې به رامنځته کېږي او هغه ادارې چې له شرکتونو سره قراردادونه لري د بودیجې تصویب ته منتظر دي.»
د اقتصاد وزارت مسلکي معین عبداللطیف نظري وایي، سرپرست حکومت د ملي بوديجې د سږنۍ طرحې په چوکاټ کې د يو لړ اساسي پراختيايي پروژو بشپړولو هڅه کوي او په لړ کې به يې زرګونه کسانو ته د کار کولو زمينه هم برابره شي.
نظري زیاتوي: « زموږ په راتلونکي پلانونو کې هغو پرګرامونو ته لومړیتوب ورکول کېږي چې زیربنايي اړخ لري او د هېواد د اقتصادي ودې، پراختیا او د افغانستان د ځان بسیانې په برخه کې مهم رول ولري، همداراز هغه پروژې په پام کې لرو چې کولی شي د هېواد ځوانانو ته کاري زمینې برابرې کړي او په تدریجې ډول د فقر کچه راټيټه کړي.»
دا په داسې حال کې ده، چې تېر کال د سرپرست حکومت چارواکو ویلي وو چې ټولې پراختیايي پروژې په کور دننه له راټولو شويو عوايدو تمويل کېږي.
