د افغانستان اطلاعاتو او کلتور وزارت مرستیال ذبیح الله مجاهد وايي، له افغانستان سره د نړیوالو له لوري اعلان شوې بشري مرستې بسنه نه کوي او اړتیا ده چې په بېلابېلو برخو کې خپلو مرستو ته دوام ورکړي.
مجاهد زیاته کړه: «دا مرستې بسنه نه کوي.د افغانستان خلک تازه له جګړې راوتلي، اقتصادي ستونزې ډېری شوي او حل یې وخت نیسي.»
مجاهد د نړیوالو له مرستو هرکلی کو ي او زیاتوي، په اوسني وخت کې د نړیوالو مرستې کمې دي او د ټولو اړمنو افغانانو ستونزې نه شي حل کولی.
په ورته وخت کې مجاهد ډاډ ورکوي چې د نړیوالو مرستې به په شفاف ډول پر اړمنو کسانو وویشي.
مجاهد زیاتوي: «د مرستو هرکلی کوو او د شفافیت ډاډ ورکوو. د فقر له منځتلو لپاره پلان شته او له بهرنیو سره په ناستو کې د اقتصادي ستونزو لپاره خبرې کېږي»
اخوا د سیاسي چارو یو شمېر شنونکي وايي، نړیوال باید افغانان یوازې پرې نږدي او میلیونونه کسان چې دا مهال له فقر سره مخ دي لاسنیوی دې وکړي.
د سیاسي چارو شنونکی اجمل سهیل وايي: «د نړیوالو مرستې لا هم کمې دي او دا ضرروت دی، چې نړیوال په داسې وخت کې د افغانانو لاسنیوی وکړي، اسلامي امارت باید د دې ستونزې د حل لپاره پلان ولري.»
نیوکې پر اسلامي امارت دي چې د افغانانو د اقتصادي ستونزو د حل لپاره پلان نه لري، خو د اسلامي امارت مسوولین بیا وايي، د ستونزو د حل لپاره پلان لري او د وخت په تېریدو به هر څه سم شي.
