د افغانستان لپاره د ملګرو ملتونو د بشري حقونو ځانګړي راپور ورکونکي په خپل تازه خپاره کړي راپور کې د افغان ښځو او نجونو پر وضعيت د اندېښنې ښودولو ترڅنګ ویلي، اوس مهال په دې هېواد کې د بشري حقونو وضعيت بحراني دی.
ریچارډ بېنېت په دې راپور کې زیاته کړې، افغانستان کې د بشري حقونو دې بحراني وضعيت په ځانکړي ډول ښځې او نجونې اغېزمنې کړې دي.
بېنېت زیاته کړې:« افغانستان د بشري حقونو له پلوه جدي بحراني وضعیت سره مخ دی او په ځانګړي ډول ښځې او نجونې یې اغېزمنې کړې دي.»
بله خوا، سرپرست حکومت د افغانستان لپاره د ملګرو ملتونو د بشري حقونو ځانګړي راپور ورکونکي څرګندونې او راپور بې اساسه بولي.
د اسلامي امارت وياند ذبیح الله مجاهد وايي، د ملګرو ملتونو سازمان تل هڅه کړې چې د افغانستان په اړه بې اساسه مسايل مطرح او واقېعیتونه پټ کړي.
مجاهد په دې اړه وايي: « موږ همېشه دغه شان موضوعات څارلي او څېړلي، خو متأسفانه د ملګرو ملتونو د افغانستان څانګه (یوناما) چې دوی ته راپورونه چمتو کوي، پر دوه درېیو موضوعاتو فوکس کوي او غواړي د پروپاګند په توګه یې وکاروي، حال دا چې موږ افغانستان کې په اجتماعي، اقتصادي، سیاسي او امنیتي لحاظ ښه پرمختګونه لرو. دا هغه څه دي چې د افغانستان خلک ضرورت ورته لري؛ خو له بده مرغه د یوناما په راپور کې دغو موضوعاتو ته هېڅ اشاره نه کېږي او سطحي پرې تېرېږي. بله خبره دا ده چې افغانستان کې ځینې موضوعات ارزښتي موضوعات دي، ځینې یې د وخت په ستونزو پورې اړه لري، ځینې د نظام او افغانستان له علیا ګټو سره تړاو لري او له همدې امله مطرح شوي دي؛ دوی پر دغو موضوعاتو فوکس کوي او په یو ډول د اسلامي امارت پر وړاندې تبلیغاتي ګټه ترې اخلي. زموږ په اند دا بریالۍ لاره نه ده او ښه دا ده چې یوناما د افغانستان او نړیوالې ټولنې ترمنځ نږدې کېدو او شته سوء تفاهم لرې کولو ته کار کړی وای.»
په ورته وخت کې د سیاسي چارو شنونکي که څه هم په هېواد کې د نجونو او ښځو لپاره د زده کړو او کار زمینې پر برابرولو ټنیګار کوي، خو له نړیوالو غواړي چې د بشري حقونو اړوند مسايل سياسي نه کړي.
د سیاسي چارو شنونکی معین ګل څمکنی وايي: « نه یوازې دا چې د افغانستان مساله یاده کړي بلکې غواړي د افغانستان ستونزه د ښځو د حقونو تر عنوان لاندې سیاسي کړي او سیاسي ګټه ترې واخلي. هیله لرو چې ملګري ملتونه دې خپل مسوولیتونه له ځمکنیو واقعیتونو سره برابر کړي، ترڅو هم خلک پرې باور وکړي او هم نړۍ. داسې یو اړخیز ګامونه کولی شي د ملګرو ملتونو باور ته سخت زیان واړوي.»
که څه هم وخت ناوخت د افغانستان بشري، امنيتي او سياسي وضعيت په تړاو د نړیوالو له خوا بېلابېلې اندېښنې مطرح شوې دي، خو سرپرست حکومت بیا بیا دغه اندېښنې بې ځایه بللې او ټینګار کړی چې نړیوال باید د افغانستان په تړاو واقېعیتونه درک کړي.
