د اسلامي امارت ویاند ذبیح الله مجاهد تائیدوي، چې د دوو امریکایي اتباعو په ګډون ځینې بهرنیان ورسره بندیان دي.
نوموړي شمشاد سره په خبرو کې ویلي، دغه کسان یې د قوانینو د نقض او سرغړونې له امله نیولي او په خبره يې هغه بهرنیان چې افغانستان ته راځي، بايد ټولو قوانینو ته پابند و اوسي.
مجاهد زیاتوي، د نيول شویو امريکايي اتباعو په تړاو یې له امریکایي لوري سره خبرې کړې؛ خو د نوعیت په تړاو څه نه وایي.
هغه وايي: « له بهره چې څوک افغانستان ته راځي باید د افغانستان قوانینو ته پاملرنه وکړي، څوک چې له قوانینو سرغړونه کوي او هغه تر پښو لاندې کوي نو مجرم پېژندل کېږي او توقیف کېږي. ځېنې بهرني اتباع به توقیف شوې وي؛ په هغوی کې دوه تنه امریکایان هم شته چې جرم یې د افغانستان د قوانینو نه مراعت کول دي او په دې اړه له امریکایانو سره خبرې او بحثونه شوې دي.»
له دې وړاندې د امریکا ملي امنیت شورا دوو چارواکو (اېن.بي سي) نیوز ته ویلي و، چې دوه امريکايي وګړي یې په افغانستان کې له اسلامي امارت سره بندیان دي.
په یادو کسانو کې یو یې ریان کوربېټ دی او د ۲۰۲۲ز کال په اګسټ میاشت کې نیول شوی او د بل کس مشخصات لا تر دې دمه څرګند نه دي.
د پوځي چارو شنونکو په باور، هر بهرنی وګړی چې افغانستان ته راځي، اړتيا ده چې د افغانستان ټول قوانین ومني او د سرغړونې په صورت کې يې کوربه هېواد د نیولو او ترې د پوښتنو ګروېږنو حق لري.
د پوځي چارو شنونکی اخترمحمد راسخ وايي: « امریکايي اتباع چې په افغانستان کې د اسلامي امارت له لوري بندیان شوې دي او طالبانو هم دا تائید کړې ده؛ نو زما په نظر دا نړۍ ته د فشار یو پیغام دی چې بهرنیو اتباعو یا د شرقي او غربي نړۍ اتباعو ته افغانستان د سیاحت د امن په کور نه دی بدل شوی.»
له دې وړاندې د امریکا د بهرنیو چارو وزارت د دوی نیول کېدل تېروتنه او غیرقانوني کړنه بللې وه او دغه چاره یې له سرپرست حکومت سره د تعامل په برخه کې یو لوی خنډ بللی و.
د نړيالو اړیکو شنونکی نجیب الرحمان شمال د ډېپلوماټیکو چینولو له لارې د دې موضوع د حل غوښتننه لري او زیاتوي چې دغه مساله باید د هېوادونو ترمنځ د لویو ستونزو د ایجاد لامل نه شي.
شمال وايي: « له دې مسالې باید د یوې سیاسي ضربې په توګه ګټه وا نه خېستل شي او په هغه صورت کې چې امریکايي اتباع په غیر قانوني ډول افغانستان ته راغلي وي یا یې کوم جرم ترسره کړی وي؛ نو د قانون له مخې دې د هغوی جرم تثبیت شي او که نه بیا دې د سیاسي او ډیپلوماټيکو لارو د دغو امریکايي اتباعو د خوشې کېدو په اړه اقدام وشي، ځکه په هېواد کې د بهرنیو اتباعو بې برخلیک پاتې کېدل کولی شي د امریکا او افغانستان اړیکې لا پسې خرابې کړي.»
دا په داسې حال کې ده چې امریکايي رسنیو د راپور له مخې ریان کوربېټ چې مشخصات یې څرګند دي، لومړی ځل څوارلس کاله وړاندې په ۲۰۱۰ کال کې افغانستان ته راغلی او هغه په ۲۰۱۷ کال کې په کابل کې د بلوم په نامه د سوداګرۍ سلا مشورو کمپنۍ جوړه کړې وه، چې د خصوصي سکتور په برخه کې یې وړو کاروباري کمپنیو او شرکتونو ته سلامشورې ورکولې.
هغه د اسلامي امارت له بیاځلې واکمنېدو وروسته د خپلو پاتې کارونو پرمخ بېولو لپاره د ۲۰۲۲ز کال په لومړۍ میاشت افغانستان ته را ستون شو؛ خو د مالوماتو له مخې، کله چې نوموړی د همدې کال په اګست میاشت کې د دویم ځل لپاره کابل ته سفر وکړ له خپلو درېیو تنو نورو همکارانو سره چې یو جرمني تبعه او دوه نور افغانان وو؛ نیول شوی دی.
