دلته په ملي دفاع وزارت کې د حکومت ملکي او نظامي چارواکي د شاه امانالله خان تر قیادت لاندې د افغان ولس په لاس له انګرېزانو د بېرته اخیستل شوې ازادۍ ۱۰۶مه کليزه نمانځي.
دوی په دې ورځ هم د خپلو ځينو لاسته راوړنو يادونه کوي او زياتوي چې تر ټولو مهمه امنيتي لاسته راوړنه يې د داعش ځپل دي.
چارواکي زياتوي، د دې ډلې په ځپلو سره يې د نړيوالو هغه اندېښنې رفع کړې دي چې په افغانستان کې يې د داعش د موجوديت په اړه درلودې.
د استخباراتو عمومي رییس عبدالحق وثيق وايي: « درېیمه خبره دا ده چې خلک دې اوس دا فکر نه کوي چې د تېر په څېر به بیا اشغال راځي او اسلامي امارت به دړې وړې کېږي. دا ځل امارت قوي امارت او نظام دی او هېڅوک نه شي کولی د امارت په مقابل کې څه وکړي.»
د حکومت نور نظامي چارواکي پرته له دې چې د کوم هېواد نوم واخلي وايي، هېچا ته د افغانستان په چارو کې د لاسوهنې اجازه نه ورکوي.
دوی د حکومت ځينو مخالفانو ته هم د پيغام په توګه وايي، د اوسني حکومت د کمزوري کولو او له منځه وړلو خوب دې نه ګوري او په خبره يې، بهرنيان به يې هم ښايي په افغانستان کې د ترلاسه کړې تجربې له مخې ملاتړ ته زړه ښه نه کړي.
د ملي دفاع وزیر محمد یعقوب مجاهد وايي: « د دوی د دسیسو پر وړاندې باید هوښیار واوسو او هېڅکله هغو اشخاصو ته اجازه ورنه کړو چې د پردیو په اشاره زموږ د نظام، زموږ د وطن او زموږ د لاسته راوړنو ناکامه کولو لپاره هڅې کوي.»
مولوي يعقوب د شاه امانالله خان له لوري د خپلواکۍ له ترلاسه کولو وروسته خپلمنځي اختلافونه د ستونزو عمده زېږنده بولي او له همدې کبله له خلکو غواړي چې د اختلاف برعکس د اوسني حکومت ملاتړ وکړي.
مجاهد زیاتوي: « اوسنۍ اردو ستاسو خادمان، ستاسو د سر، مال او ناموس ساتونکي، ستاسو بچۍ او ستاسو وروڼه دي. تر شاه یې ودرېږئ او په هر ډول شرایطو کې یې ملاتړ وکړئ. دوی به د دې نظام او هېواد ساتنه کوي او پر خپلو کړو ژمنو به عمل کوي.»
چارواکو یو ځل بیا له نړیوالو وغوښتل چې له اوسني حکومت سره مثبتې اړیکي اختيار کړي او له خپل اړخه ډاډ ورکوي چې د افغانستان خاوره او حريم به د هېچا پر ضد ونه کارول شي.
