ټاکل شوې روسیه د روانې جنورۍ میاشتې په وروستیو کې د افغانستان په تړاو د یوې څلوراړخیزې ناستې کوربه وي.
د افغانستان لپاره د روسیې ځانګړي استازي ضمیر کابلوف په دې ناسته کې د چین، ایران او پاکستان د ګډون د خبر ترڅنګ، له نړۍ سره د تعامل پر څرنګوالي بحث، د ټولګډونه حکومت رامنځته کېدل، له ترهګرۍ سره مبارزه او دغه راز د نشه يي توکو اړوند د متصورو جرمونو پر سر خبرې د بحث غټ ټکي بللي.
د اسلامي امارت ویاند ذبیح الله مجاهد د افغانستان د موضوعاتو پر محوریت د ورته ناستو جوړېدل اړین بولي؛ خو ټینګار لري چې د سرپرست حکومت استازی باید په کې ګډون ولري او د ناستې اصلي برخه وي.
د مجاهد په خبره، د ورته ناستو اصلي موخې باید له سیاسي اهدافو ورهاخوا د افغانانو اصلي غوښتنې منعکس کړي.
مجاهد زیاتوي: « کومې ناستې چې د افغانستان په اړه کېږي یو شرط یې دا دی چې د افغانستان استازي په کې ګډون ولري او له خپل دریځه هلته دفاع وکړي. دویمه خبره دا چې هر ډول ناستې باید د افغانستان په ګټه وي، د هېواد ثبات، امنیت او بیارغونې کوم کارونه چې روان دي، دا دې د نړیوالو غونډو په وسیله همغږي شي. له بده مرغه ځېني کسان د افغانستان په غېر حاضرۍ کې غږېږي چې دا هېڅ ګټه نه لري او د ځېنو ناستو موخې بل څه وي، چې دا بیا نوې ستونزې زېږوي.»
په ورته مهال د سیاسي چارو یو شمېر شنونکي هم په ورته ناستو کې د اوسنیو چارواکو ګډوڼ د لا زیاتې اغیزمنتیا لپاره حتمي بولي.
د دوی په باور که نړۍ په رېښتوني ډول د افغانستان معظلې او ستونزې ته د حللار موندنې په لټه کې دي باید د افغانستان ځمکنيو شرایطو او ملي ګټو ته په دریځ غوره کړي.
د سیاسي چارو شنونکی عبدالجبار اکبري وايي: « که په دغو ناستو کې د افغانستان اوسني حکومت استازي ګډون ولري؛ نو بیا به ځانګړی اهمیت ولري، ځکه چې د فغانستان استازی به هلته وکولی شي په مستقیمه توګه د امنیت، اقتصادي اړیکو، سوداګرۍ او سیاست په برخو کې د افغانستان ستونزې له نړیوالو سره شریکې کړي.»
ځینې نور که څه هم د دې ناستې د بحث موضوعات تکراري ګڼي؛ خو په سیمه او نړۍ کې روانو حالاتو ته په کتو وايي، روسیه او چین د سیمې لویو قدرتو په توګه غواړي له دې لارې په سیمه کې ځان ته لابي وکړي.
د شنونکو په باور دغه هېوادونه غواړي له دې لارې د افغانستان په قضیو کې ځان ښکېل وښيي او په راتلونکې کې له دې لارې خپلې اقتصادي او سیاسي ګټې خوندي کړي.
د سیاسي چارو شنونکی شهسوار سنګروال وايي: « په ټوله کې روسیه او چین هڅه کوي چې خپل پلویان په سیمه او نړۍ کې زیات کړي.»
روسیه داسې مهال د افغانستان په تړاو د ناستې کوربتوب کوي چې ملګرو ملتونو په نږدې راتلونکي کې په قطر کې د یوې بلې ناستې د رابللو ټټر وهلی چې په کې به له افغانستان سره د تعامل په څرنګوالي او د لار نقشې په تړاو بحث وشي.
که څه هم د دې ناستې کره نېټه لا نه ده مالومه؛ خو په کې د نړۍ د بېلابېلو هېوادونو استازو د ګډون خبر ورکړل شوی
