د افغانستان اسلامي امارت،هغه دوه بهرني خبریالان خوشې کړل،چې پنځه ورځې وړاندې یې له خپلو افغان همکارانو سره یوځای نیولي ول.
د اسلامي امارت ویاند ذبیح الله مجاهد وايي، یادو کسانو پیژندپاڼې،جوازنامې او اړین اسناد نه درلودل، چې د اړوندو مرجعو له تائید وروسته،خوشې شوي دي.
مجاهد زیاته کړې:« هغه بهرني اتباع،چې ځانونه یوې نړیوالې موسسې ته منسوب کول، له دې امله چې پیژندپاڼې،جوازنامې او لازم اسناد یې نه درلودل، توقیف شوي ول. هغوی په ښه حالت او له خپلو کورنیو سره اړیکه کې ول، د هویت د تثبیت او له مسوولې مرجع څخه تر ډاډ وروسته خوشې شول.»
د ژورنالیستانو د ملاتړ بنسټونه وایې،افغانستان ته د بهرنیو خبریالانو راتګ ګټور دی،خو دوی دې په اصولې او قانوني توګه دلته خپلې چارې مخته یوسي.
د ژورنالېستانو د ملي ټولنې مشر حفیظ الله بارکزی وايي:« کله چې بهرني خبریالان راځي، د بهرنیو چارو وزارت له لوري باید ځانته ثبت نام وکړي او بیا د افغانستان د رسنیو او خبریالانو له فدراسیون سره همغږي وکړي.
که دوی غواړي،چې یو ښه بې طرفه راپور جوړ کړي،څه چې نړیوال اصول وايي، دا به د افغانستان پر ګټه تمامېږي.»
د رسنیو او خبریالانو فدراسیون غړی حجت الله مجددي بیا وايي:« زموږ غوښتنه له بهرنیو رسنیو او خبریالانو دا ده،کله چې افغانستان ته سفر کوي او په ځانګړي ډول کله چې د رسنیز کار لپاره سفر کوي،باید د افغانستان اصول په پام کې ونیسي.»
خبریالان وایې،د دوې د مالوماتو له مخې، تر اوسه نیول شوي خبریالان د خبریالۍ له امله نه بلکې د یو شک پر اساس نیول شوي دي، نو په کار ده،چې اسلامي امارت کورنیو او بهرینو خبریالانو ته د پېژندنې ځانګړي کارتونه ورکړي.
افغانت خبریال یوسف ظریفي وايي:«اسلامي امارت باید پر داسې تګلاره کار وکړي،چې یو مشخص کارت جوړ کړي،یا یو مشخص مکتوب وي،هغه خبریالان چې له بهرنیو هېوادونو دلته د کار لپاره راځي، دا د هغوی حق دی،چې دلته راپور جوړ کړي. د خلکو ستونزې منعکسې کړي.»
اسلامي امارت په ټینګار ویلي، د رسنیو ازادۍ ته ژمن دي،خو د اسلامي امارت له واکمنۍ وروسته لسګونه رسنۍ د بېلابېلو لاملونو له امله تړل شوي دي.
