په داسې حال کې چې پاکستان په قبايلي سيمو کې د ناامنۍ له امله په کراتو افغانستان ته د پړې ګوته نيولې، خو د اسلامي امارت ویاند ذبیح الله مجاهد وايي، ۴۳ تنه پاکستاني وګړي چې په افغانستان کې يې د ترهګريزو بريدونو د ترسره کولو اراده درلوده، نيولي دي.
د مجاهد په خبره، دا کسان له دقيق تشخيص وروسته داسې مهال نيول شوي، چې له ډېورنډ فرضي کرښې د افغانستان حدودو ته داخل شوي وو او له هغه ځايه يې د کابل په ګډون يو شمېر ولايتونو ته د تګ هڅه کوله.
مجاهد زیاتوي: « د بېلابېلو هېوادونو اتباع په تېر کال کې نیول شوي او وژل هم دي، چې داعش سره یې کار کاوه، پټن ځایونه یې درلودل یا یې عملیات کول یا یې کله کله د بریدونو تابع درلوده چې هدف ته تر رسېدو وړاندې نیول شوي او په دې کې پاکستانیان هم ول. عمومي مالومات چې موږ یې لرو دغسې سلګونه کسان نیول شوي. په تېر کال چې ۴۳ کسان په کې پاکستاني اتباع ول.»
د پوځي چارو کارپوهان وايي، له دې دا جوتېږي چې په پاکستان کې مېشتې ترهګرې ډلې هڅې کوي په افغانستان کې امنيت خراب کړي.
د دوی په خبره، سرپرست حکومت دې د يادو ډلو پر وړاندې څار زيات او په افغانستان کې دې يې د فعاليت مخه ونېسي.
د پوځي چارو کارپوه محمدمتین محمدخېل وایي: « دا پاکستان دی چې غلطه ستراتیژي او پالېسي تعقیبوي او غواړي له خپلو ټولو ګاونډيانو سره سمه اړیکه ونه لري، لکه تاسې چې ولیدل دوی خپله دا اقرار وکړ چې موږ له ګاونډیانو سره ښې اړیکې نه دي پاللي، دا خبره خپله نواز شریف وکړه له عمان، ایران سره هم همداسې دي؛ نو دا پاکستان دی چې له ګاونډيانو سره ښې اړیکې نه پالي.»
خو ځيني نور بيا باور لري چې په پاکستان کې بېلابېلې ترهګرې ډلې شتون لري او دا ډلې هڅه کوي چې د دې هېواد له اشارې سره سم په افغانستان کې عمل وکړي.
دوی ټينګار کوي چې سرپرست حکومت دې په افغانستان کې د يادو ډلو د فعاليت مخنيوي په موخه له پاکستان سره خبرې وکړي او اجازه نه دې نه ورکوي چې په پاکستان کې مېشتې ترهګرې ډلې په افغانستان کې امنيت خراب کړي.
د پوځي چارو کارپوه صادق شینواری وايي: « ترهګرې ډلې په پاکستان کې روزل کېدې او اوس مهال په پاکستان کې نږدې تر ۷۲ زیاتې ترهګرې ډلې شته دي چې ۴۵ په کې فعالې دي او خپل فعالیتونه ترسره کوي او ۳۵ ډلې له داعش سره بشپړې اړیکې لري.»
د اسلامی امارت چارواکي وایي، هیچا ته به اجازه ورنه کړي چی امنیتي وضیعت ګډوډ کړي او یا هم د افغانستان له خاوری نورو هېوادونو ته ګواښ پېښ کړي.
دوی ډاډ ورکوي چې د ناامنۍ د عناصرو پر وړاندې يې عمليات ترسره کړي او د دوی د فعاليت بشپړ مخنيوی يې کړی دی.
