د اسلامي امارت ویاند د امریکایي ځواکونو بیا راګرځېدنه ناشوني بولي او وایي، دا هېڅ امکان نه لري چې هغوی یو ځل بیا افغانستان ته را وګرځي.
ذبیحالله مجاهد وایي، افغانستان یو خپلواک هېواد دی او هېڅ بهرني ځواک ته اړتیا نه لري.
مجاهد له ملي ټلویزیون سره په خبرو کې هغه ادعاوې په کلکه رد کړې چې وايي، په بګرام هوايي اډه کې یوې امریکايي پوځي الوتکې ناسته کړې.
هغه زیاته کړې: « ما هم واورېدل ځینو کړیو دا شایعات خپاره کړي، خو دا حقیقت نه لري. د افغانستان خلک پوهېږي چې دا امکان نه لري، افغانستان یو خپلواک هېواد دی او خپلواک امنیتي ځواکونه لري. د هېڅ یوه هېواد نظامیانو ته اړتیا نه شته او اجازه هم نه ورکول کېږي چې دلته راشي. په دې اړه پروپاګنډا د عامه ذهنیتونو د تخریب لپاره کېږي.»
د سایسي چارو څارونکي بیا وایي، ځینې هېوادونه او کړۍ په لوی لاس هڅه کوي چې د بګرام هوایي اډه له پوځي ډګره په سیاسي ډګر بدله کړي.
د دوی په باور، سرپرست حکومت باید د دې هېوادونو او کړیو د پروپاګنډا مخه ونیسي.
د سیاسي چارو شنونکی خلیل احمد نادم وايي:« بګرام او نورې هوايي اډې د افغانستان د خاورې یوه برخه ده او ستراتیژيک هوايي ډګرونه دي. په دې شوې ادعاوې ناسمې دي، خو د افغانستان دولت کولی شي د امتیاز په بدل کې دغه هوايي اډه بل هېواد ته په اجاره وکړي.»
د امریکا ولسمشر ډونالډ ټرمپ د تېرې فبروري میاشتې پر ۳مه د بګرام هوایي ډګر د امریکا لپاره خورا ارزښتمن بللی و او ویلي یې و چې د افغانستان دغه سټراټيژیکه اډه اوس مهال د چین په واک کې ده.
بګرام هوايي اډه نږدې ۶۰ کاله مخکې د افغانستان د پخواني پادشاه محمد ظاهرشاه په واکمنۍ کې جوړه شوه، خو ویل کېږي، اوس د هغه وخت پنځه برابره پراخه او د سیمې پر کچه په عصري امکاناتو سمبال ده.
د کابل ګاونډي پروان کې پرته دغه اډه د افغانستان تر ټولو مجهز هوایي ډګر هم ګڼل کېږي چې په کې د هر ډول الوتکو کېناستلو وړتیا شته.
د پوځي چارو شنونکي د بګرام اډه د جګړې مهارولو ستراتیژیک ځای بولي.
دوی وایي، په خپلواکه بڼه افغان ځواکونو ته له تجهیزاتو او امکاناتو سره د دې هوايي اډې سپارل مهم ګام دی.
د پوځي چارو شنونکی اسدالله ندیم وايي: « بګرام په سیمه کې یوه بې ساري هوايي اډه ده. د دې اډې ټول تأسیسات او د الوتنو بانډونه بشپړ دي او هېڅ کمی نه لري. افغانستان دا مهال داسې هوايي ځواک نه لري چې له دې اډې ګټه واخلي.»
بګرام هوايي اډه په افغانستان کې د امریکايي ځواکونو تر ټولو ستره اډه وه او په کې زرګونه امریکايي سرتېري اوسېدل.
له دې ځایه په ټول افغانستان کې پوځي فعالیتونه تنظیمېدل، خو کله چې امریکايي ځواکونه له افغانستانه ووتل، دا اډه اوس د اسلامي امارت تر واک لاندې راغله.
