د افغانستان اسلامي امارت د ملګرو ملتونو هغې ادعا ته غبرګون ښودلی، چې له افغانستان څخه يې د داعش ډلې د ګواښ موجوديت په تړاو کړې.
د اسلامي امارت ویاند ذبیح الله مجاهد په افغانستان کې د يادې ډلې فزيکي حضور په قاطعيت سره ردوي او د ملګرو ملتونو په شمول د لوېديځو هېوادونو هغه اندېښنه بې ځايه بولي چې ګواکي له افغانستانه بهر نورو هېوادونو ته د داعش ډلې د نفوذ ګواښ موجود دی.
مجاهد ورته څرګندونې د داعش او نورو ډلو لپاره لابي او د عامه ذهنیتونو د مديريت کولو هڅه ګڼي.
هغه زیاتوي: « موږ دغه تشویش ردوو، په افغانستان کې د داعش او نورو ډلو د شتون په اړه د لوېدیځو نهادونو او هېوادونو ادعا په کلکه ردوو. داعش پدیده په افغانستان کې ځپل شوې ده او پاتې کسان یې متواري او د امنیتي ځواکونو تر سخت تعقیب لاندې دي. متأسفانه یو شمېر لوېدیځ هېوادونه او نهادونه د دا ډول اندېښنو په ښکاره کولو سره غواړي داعش ته کمپاین وکړي او لوی یې وښيي. موږ دا ډول ادعاوې رودوو او ډاډ ورکوو، چې اسلامي امارت پر وضعیت کنټرول لري.»
د سیاسي چارو یو شمېر کارپوهان د نړیوالو سازمانونو لخوا د داعش موجودیت په تړاو ادعاوې په افغانستان کې د لاسوهنې پلمه ګڼي او وایي، ورته پلمې ښايي تر هغې دوام ورکړي، څو چې سرپرست حکومت د نړیوالې ټولنې مشروع غوښتنې نه وي منلي.
دوی پر سرپرست حکومت غږ کوي، که غواړي له دغو فشارونو ځان خلاص کړي، د نړیوالو مشروع غوښتنې دې ومني.
د سیاسي چارو کارپوه توریالی ځاځی وايي:« دا هغه پلمې او سیاسي فشارونه دي چې امریکا یا ملګري ملتونه غواړي پر طالبانو یې وارد کړي. دا به تر هغو ادامه ولري چې طالبان د امریکا او ملګرو ملتونو مشروع غوښتنې ومني. که طالبان غواړي له دغو تورونو څخه ځان، ولس او هېواد وژغوري، د نړیوالو مشروع غوښتنې دې ومني چې تر ټولو مهمه یې د نجونو پر مخ د ښوونخیو د دروازو پرانیستنه ده.»
ځېنې نور بیا د لوېدیځوالو دغه شان څرګندونې د داعش په څېر ډولو د لوی ښودنې هڅه بولي او وايي، له يادو ادرسونو د افغانستان په تړاو خپرېدونکي مالومات په ډېرو مواردو کې د حقايقو خلاف دي.
دوی د لوېدیځ دغه شان ادعاوې په افغانستان کې بیا ځل لاسوهنې ته د زمینې چمتو کول بولي.
د سیاسي چارو کارپوه محمد سلیم پیګیر وايي:« هغه راپورونه چې په دې وروستیو کې د داعش په اړه د لوېدیځو هېوادونو له خوا وړاندې کېږي، د دغې ډلې د لوی ښودنې لپاره دي ترڅو یو ځل بیا د افغانستان په کورنیو چارو کې د لاسوهنې زمینه برابره کړي.»
د جمعې په ورځ له ترهګرۍ سره د ملګرو ملتونو د مبارزې څانګې مشر ولادیمیر ورونکوف د دې سازمان امنیت شورا په غونډه کې خبرداری ورکړ ،چې داعش ډله یو ځل بیا پیاوړې شوې او له افغانستانه د باندې یې د برېدونو ګواښ موجود دی.
نوموړی دغه راز ادعا کړې، چې د داعش خراسان څانګې خپل مالي او لوجیستیکي ځواک زیات کړی او له دې سره د لویو برېدونو د ګواښ وېره هم رامنځ ته شوې ده.
