د اسلامي امارت ویاند له ملي ټلوېزیون سره په یوه تازه مرکه کې د نورو موضوعاتو ترڅنګ، د اساسي قانون د اړتيا پر څرنګوالي هم خبرې کړې دي.
ذبيحالله مجاهد دا نه مني چې ګني سرپرست حکومت د اساسي قانون نه لرلو له امله قانوني خلا سره مخ دی او په خبره يې، شريعت د اوسني حکومت قانون دی او پر بنسټ يې په محاکمو کې پرېکړې کېږي.
مجاهد اساسي قانون د سیاسي جنبې لرونکی او د وخت غوښتنه يادوي او وايي، د زمينې له برابرېدو سره به يې د جوړولو په اړه سرپرست حکومت اقدامات وکړي.
هغه په دې اړه وايي: « اساسي قانون د وخت غوښتنه او سیاسي موضوع ده، کله چې زمینه برابره شوه ګامونه به واخیستل شي، خو اوس مهال د وزارتونو لپاره د قوانینو جوړول، د محاکمو قوانین، د خلکو د روزمره ژوند لپاره د اسانتیاوو جوړېدو په قوانینو باندې جدي کار روان دی او دا چې د حکومت عرابه چلېږي او روان دی، دا تکمیل شي. اساسي قانون همیشه سیاسي وي او د زمینې په مساعدېدو سره به کار پرې وشي.»
د سرپرست حکومت رسميت پېژندنه د نوموړي د مرکې يوه بله برخه وه او تمه يې ښودلې چې ښايي نور هېوادونه به هم په دې برخه کې د روسیې پر قدم پل کېږدي او سرپرست حکومت به پر رسمیت وپېژني.
مجاهد زیاتوي، له هېڅ هېواد سره ستونزه نه لري او سرپرست حکومت اوسمهال له زياتو هېوادونو سره په تعامل کې دی.
مجاهد زیاته کړې: « له نورو هېوادونو هم غواړو چې د روسیې په پله پل کېږدي او شاجاعانه ګامونه واخلي او له افغانستان سره خپلې اړیکې اعلان کړي. موږ له ګڼو هېوادونو سره تعاملات لرو، تګ راتګ لرو، سفرونه او راکړه ورکړه لرو، مګر ځینې هېوادونه په اعلان کې تر اوسه ساکت دي، موږ هیله کوو چې ټول دې اړیکې ښکاره کړي او له افغانستان سره سیاسي تعامل ولري.»
خو د سیاسي چارو تحليل کوونکي په بېړه روسيې ته ورته د سرپرست حکومت په اړه د هېوادونو پرېکړه له امکان لرې ګڼي او زياتوي، د وخت په تېرېدو سره ښايي هېوادونه د خپلو ګټو په پام کې نيولو سره د افغانستان سرپرست حکومت د رسميت پېژندنې او ورسره د اړيکو پرېکړه وکړي.
د سیاسي چارو شنونکی محمد سلیم پیګیر وايي: « د روسیې له فډراټیف جمهوریت وروسته، زه باور لرم چې د منځنۍ آسیا هېوادونه، چین، هند، ایران، انډونیزیا او یو شمېر نور هېوادونه چې دا مهال له اسلامي امارت سره ډېر تعامل لري، د افغانستان اسلامي امارت پر رسمیت وپېژني، خو دغه کار به له هغو سترو هېوادونو سره تر مشورو وروسته وکړي چې د رسمیت پېژندلو مخه نیسي.»
په همدې حال کې اسلامي امارت وايي، له امریکا سره هم اړیکې لري او وخت ناوخت یې پلاوي سره خبرې هم کوي او ان تر دې چې له واشنګټن یې د سرپرست حکومت د رسمیت پېژندنې غوښتنه کړې، خو لا هم په دې برخه کې کومې پایلې ته نه دي رسیدلي.
