بلخوا د سیاسي چارو شنونکي په دې باور دي چې د پاکستان پوځي رژیم تل د خپلو کورنیو ستونزو پړه پر ګاونډیو هېوادونو اچولې.
د دوی په وینا، اسلام اباد په کوردننه د سیاسي او اقتصادي ننګونو پر وړاندې تبعیضي چلن کړی چې دې چارې نه یوازې مخالفتونه زیات کړي بلکې په لویه کچه یې ناامنیو ته لاره هواره کړې ده.
د سیاسي چارو کارپوه روح الله هوتک وایي: «دا د پاکستان حکومت له لوري د دواړو خواوو پښتنو زورونه ده چې ناامنۍ ته یې زمینه برابره کړې ده، پاکستان په تاریخي لحاظ افغانستان کې لاسوهنه درلودلې او بیا یې هم د افغانستان او سیمې د ناامنۍ کولو لپاره ملا تړلې ده؛ ځکه داخلي ستونزې قومي او اقتصادي ستونزې خپل پټې کړي او له همدې امله هم (ټي.ټي،پي) پیاوړي شوي دي. اسلامي امارت په هېواد دننه د داعش پر ضد عملیات ترسره کړي او دا په سیمه کې د ثبات لپاره مرسته کوي او دا د پاکستان د اوسني رژیم او چې پخوا یې هم مخینه درلودله او اوس هم ورته مخه کړې د مخدره موادو قاچاق، کر او نور مافیایي برخو کې د فساد له امله ښکېل پاتې شوی دی نو پاکستان خپل ملت له ځانه بې زاره کړی دی.»
د سیاسي او پوځي چارو کارپوه، احمد خان اندړ: «پاکستان نه یوازې افغانستان ته بلکې د شانګهای همکارۍ سازمان غړو هېوادونو ته هم ترهګر پخوا هم روزلي او اوس یې هم روزي. دلته دوی کمېشنونه اخلي له خپلو بادارانو نه او نوې پروژې ترلاسه کوي؛ پاکستان په نړۍ کې د سرطان هغه دانه ده چې د دې درملنه په کار ده.»
د پاکستان بهرنیو چارو وزیر اسحق ډار وروستۍ څرګندونې داسې مهال مطرح شوي چې د شانګهای همکاریو سازمان په همدې ناسته کې د ایران بهرنیو چارو وزیر عباس عراقچي د سیمه ییز ټیکاو لپاره د افغانستان پر ثبات ټینګار درلود.
