د افغانستان اسلامي امارت ویاند ذبیح الله مجاهد پر خپله ټویټر پاڼه لیکلي،د خبریالۍ په نوم استخباراتي ماموریت ته به په افغانستان کې تر ابده اجازه ورنه کړي.
هغه زیاته کړې:«د خبریالانو په نامه د استخباراتو مامورین په خپل هېواد کې نه پریږدو.استرالیایۍ خبریاله لېن اودانیل په واقعیت کې غوښتل په افغانستان کې، د نظام پر خلاف پروپاګند وکړي او کوم استخباراتي ماموریت اجرا کړي،چې له هېواده شړل شوې او نور به د ابد لپاره افغانستان ته نه راپریښودل کیږي.»
خو د فارن پالیسۍ دغه خبریاله لېن اودانیل بیا وايي، هېڅوک پرې استخباراتي ماموریت او جاسوسي فعالیت نه شي ثابتولای او ټول اعترافونه ترې په زور اخېستل شوي دي.
اودانیل زیاته کړه:«هغوی د دغو ټویټونو پر بنسټ پر ما تور نه شي پورې کولای.له ما ویډیو شوې وه، د هغوی خبرې سمې نه دي او د هغوی چلن هم له ما سره ښه نه وه.»
فارن پالیسي ورځپاڼې او اودانیل هم لیکلي، دوی د اجباري ودونو او د زور نکاح ګانو په اړه یې راپورونه جوړ کړي ول، چې همدا یې د نیول کیدو او شړل کیدو لامل شوي.
اودانیل وايي:«زه یو کال مخکې بامیانو ته تللې وم او یو تحقیقي راپور مې جوړ کړی وه،چې نجونې په زور واده کېږي او دا راپور د طالب ځواکونو په تړاو وه،چې همدا پر هغوی ښه نه و لګیدلی،نو ځکه یې زه ونیولم.»
د همدغو لاملونو له کبله د فارن پالیسۍ د دغې خبریالې کاري جواز هم د افغانستان اسلامي امارت د بهرنیو چارو د وزارت له لوري ځنډول شوی وو.
تر دې وړاندې د وایس نیوز په نوم یوې امریکايي رسنۍ او یوې هندي رسنۍ هم داسې راپورونه کړي وو،چې د افغانستان اسلامي امارت د افغاني کلتور او اسلامي اصولو خلاف بللي وو او له هغوی یې د کاري جواز اخېستلو ترڅنګ، هغوی ته له هېواده په بېړنۍ توګه د وتلو امر هم کړی وه.
