د افغانستان اسلامي امارت د دفاع وزارت سرپرست ملا محمد یعقوب مجاهد وايي، دوحې ته یې سفر مهم او ګټور وو او قطري چارواکو ورسره په ګڼو برخو کې د مرستو او همکاریو ژمنې کړي دي.
مجاهد وايي، د قطر له چارواکو سره یې د افغان ځواکونو د معاشاتو، یونیفورم، صحت، د سرحدونو د ساتنې لپاره د تخنیکي وسایلو او وسایطو او نورو موضوعات پر سر خبرې کړي .
دغه راز مجاهد وايي، د پوځ د روزنې او مالي ملاتړ برخو کې یې له قطري چارواکو د همکارۍ او مرستو غوښتنه کړې ده او مقابل لوري د هر ډول مرستو او ملاتړ ډاډ ورکړی دی.
د مجاهد په خبره، قطري چارواکو ورسره د روغتونونو جوړولو او نورو برخو کې د مالي ملاتړ ژمنې کړي او تمه یې ښودلې ده،چې عملي به یې کړي.
د ملي دفاع سرپرست وزیر د یوه جګپوړي پلاوي پر مشرۍ د قطر په رسمي بلنه دوحې ته تللی و او هلته یې دقطر امیر، د ملي امنیت سلاکار او له پوځي مشرانو سره په امنیتي او ګډو همکاریو دوه ورځې بحثونه وکړه.
د ملي دفاع سرپرست په مشرۍ دوحې ته تللی پلاوی، د جمعې پر ورځ بېرته هېواد ته را ستون شو.
دوحه کې د افغانستان سفارت بیا ویلي، د ملي دفاع سرپرست وزیر قطر کې مېشتو افغانانو سره هم لېده کاته کړي او د هغوی ستونزې یې اورېدلي.
