Skip to content
پرکابل د طالبانو له ولکې درې ورځې وروسته د اسلامي امارت ویاند ذبیح الله مجاهد د لومړي ځل لپاره درسنیو پر وړاندې راښکاره شوه او د امارت د اوسنۍ پالیسۍ او د روان وضیعت په تړاو یې مالومات شریک کړل.
مجاهد وايي، ټولو ته یې عمومي عفوه کړې،چا سره دښمني نه پالي او هیڅ څوک له ګواښ سره مخ نه دي کولای شي چې په ارامه توګه ژوند وکړي .
مجاهد زیاته کړه:« ټولو هغو کسانو ته،چې په مقابل لوري کې ولاړ ول، عفوه شوې ده. زموږ له خوا ټول عفوه شوي دي. دغه عفوه خاص د دې لپاره وه،چې نه غواړو، نوره جګړه تکرار شي، جګړه دوام وکړي او د جګړې عوامل پاتې شي.اسلامي امارت له هېچا سره دوښمني نه لري. سر نننه له ټولو اړخونو سره دوښمني پایته رسېدلې ده. موږ نه غواړو،چې په دوښمني کې ژوند وکړو. »
مجاهد وايي،هغه سیاسي څېرې،چې په خپلو ولسونو کې ځای لري او اوس له بهر تللي هېڅ ستونزه ورته نه شته او کولای شي،چې بېرته هېواد ته راستانه او ارام ژوند وکړي .
هغه وايي:« موږ نه غواړو، د هغوی یو هم له هېواده بهر واوسي. دا یې هېواد دی. افغانستان زموږ ټولو ګډ کور دی. ګډ ارزښتونه لرو. اړېکې ورسره لرو او هڅه مو دا ده،چې ټول افغانان سره راټول شي. موږ نه غواړو،چې د افغانستان هېڅ یو رهبر،هغه کسان،چې د افغانستان خلکو ته د خدمت اراده لري او یا په ولسونو کې ځای لري، له پامه وغورځول شي.»
مجاهد هغو اندیښنو ته په ځواب کې چې ګني پوځي تجهیزات او وسلې له هېواده بهر وړل کېږي وویل،د هېواد ټول سرحدونه او کرښې یې په واک کې دي او چاته اجازه نه ورکوي،چې وسلې او تجیهزات بهر وباسي.
مجاهد زیاتوي:« موږ اوس د وسلو د قاچاق موضوع نه تائید کوو. موږ ټول سرحدات په لاس کې لرو، ډېر جدي کنټرول شتون لري. موږ خپل ولس ته ډاډ ورکوو،چې هېڅوک یو میل وسله هم بهر نه شي اېستلی.»
د مجاهد په خبره سیاسي مشران یې په داسې اسلامي او ټول شموله حکومت کار کوي،چې د داخلي اړخونو ترمنځ نړۍ ته هم د منلو وي او ترچتر لاندې یې ټول افغانان ارام ژوند وکړي.
مجاهد وايي، د ملي بیرق په تړاو به د سیاسي جوړجاړي له لارې تصمیم ونیول شي او هغه تصمیم به ټولو ته دمنلو وي.
د طالبانو ویاند ذبیح الله مجاهد نړۍ، سیمې او ګاونډیو ته ډاډ ورکوي،چې د افغانستان خاوره به یې په ضرر ونه کارول شي او اسلامي امارت له ټولې نړۍ سره ښې او دیپلوماټیکې اړیکې غواړي.
