د بهرنیو چارو وزیر وايي، د پاکستان پوځي رژیم په استانبول خبرو اترو کې له افغانستان څخه د دې تضمین غوښت چې نور به په دې هېواد کې امنیتي پېښې نه کېږي.
امیرخان متقي زیاته کړې، هغوی یو ځل له افغان پلاوي دا غوښتنه هم کړې وه چې د تحریک طالبان پاکستان(ټيټيپي) ګروپونه دې افغانستان ته واړول شي او دا هغه غوښتنه وه چې د استانبول په مذاکراتو کې د پرمختګ پر وړاندې تر ټولو لوی خنډ وګرځېد.
د بهرنیو چارو وزیر امیرخان متقي په دې اړه زیاته کړې: « د دوی غوښتنه دا وه چې موږ ته دا تضمین راکړئ چې په پاکستان کې به بیا امنیتي پېښه نه کېږي. آیا موږ د پاکستان د امنیت ضمه وار یو او آیا موږ هلته سوله ساتي ځواکونه لرو؟ آیا موږ د پاکستان د پولیسو او پوځیانو واګي په لاس کې لرو چې په وسیله یې امنیت ټینګ کړو؟ آیا پاکستان د یوې ولسوالۍ او ولایت په اندازه خاوره ده که لوی هېواد دی؟ د یوه هېواد له خوا د خپل امنیت ټينګولو په اړه له بل هېواد غوښتنه غیر معقوله غوښتنه ده.»
د بهرنیو چارو وزیر دا څرګندونې په یاد وزارت کې د ډېپلوماسۍ انسټیټيوټ د پنځمې تخصصي ښوونیزې دورې د فراغت غونډې ته وینا کې کړې دي.
هغه زیاته کړې، د پاکستان پوځي رژیم له یوې خوا تور پورې کوي چې ټيټيپي په افغانستان کې ده او له دې ځایه پرې بریدونه کوي، خو له بلې خوا دا غوښتنه او وړاندیز هم کوي چې د دې ډلې ګروپونه او قطعات دې د پاکستان تر کنټرول لاندې سيمو نه افغانستان ته واړول شي.
متقي زياتوي، که د پاکستان پوځي رژیم پر ډیورنډ کرښه د ټيټيپي وسلهوالو د تګ راتګ ادعا لري، نو ولې یې له خپلې خوا افغانستان ته د اوښتلو مخه نه نیسي؟
د بهرنیو چارو وزیر امیرخان متقي وايي: « حتا یو ځل دا غوښتنه هم وشوه چې د ټيټيپي ګروپونه د افغانستان ته واړول شي. افغانستان لېونی دی چې ستا غم خپل کور ته راوړي؟ له یوې خوا دا تور پورې کوې چې افغانستان کې ټيټيپي فعالیت لري او له هغه ځایه پر موږ حملې کوي، بیا بېرته وړاندیز کوې چې د ټيټيپي پاکستان مېشت ګروپونه او قطعات دې افغانستان ته واړول شي. ته خو په لوی لاس جنجال جوړوې.»
د بهرنیو چارو وزیر همدارنګه زیاتوي، د پاکستان پوځي رژیم د استانبول په خبرو کې د دوی غوښتنې او اندېښنې له پامه غورځولې.
هغه په دې لړ کې له پاکستانه د ده په خبرو افغانستان ته د داعش وسلهوالو او بېپیلوټه الوتکو د ورتېرېدو یادونه وکړه چې په خبره يې د افغانستان حریم نقضوي. متقي د خبرو له دوامه د انکار پړه هم پر پاکستاني رژیم واچوله.
د بهرنیو چارو وزیر امیرخان متقي په دې اړه وايي: « په مذاکراتو کې زموږ ملګرو او زموږ ټیم تر آخره پورې هېڅکله داسې نه دي ویلي چې زه ځم او نورې خبرې نه کوم. مذاکرات د دوی له خوا ترک شوي، وړاندیزونه د دوی له خوا رد شوي او بالاخره زموږ ټیم هم هېواد ته راستون شوی.»
متقي افغانستان له اوږدو جګړو او ناخوالو راوتلی يادوي او په خبره يې، حکومت له همدې امله یې متوازن سیاست غوره کړی، ترڅو له ګاونډیانو، سیمې او نړۍ سره ښې اړیکي ولري؛ خو زياتوي چې تېر کلونه مختلفو وختونو کې د پاکستان پوځي رژیم له خوا د افغانستان حریم نقض شوی.
د چارو څارونکي بیا وایي، د پاکستان پوځي رژیم تل هڅه کړې چې د خپلو نابریالیو سیاستونو او تګلارو پړه پر نورو ور واچوي. هغوی د پاکستان پوځي رژیم اوسني سیاسي تګلارې د ټولې سیمې په زیان بولي.
د سیاسي چارو شنونکی معین ګل څمکنی وايي: « زما له انده د پاکستان غوښتنې سمې نه دي بلکې پاکستان غواړي په سیمه کې تاوتریخوالی رامنځته کړي. له همدې امله د سیمې هېوادونو هند، چین، روسیې او ایران ته دا اندېښنه راپیدا شوې چې پاکستان د امریکا په ملاتړ لوبه کوي.»
د سیاسي چارو شنونکی واحد فقیري وايي: « د پاکستان دا غوښتنه چې ټيټيپي باید افغانستان ته واړول شي او د پاکستان امنیت باید افغانستان تضمین کړي، زه فکر کوم غیر معقولې غوښتنې دي. پاکستان باید خپل ګرېوان ته سر ښکته کړي او وشرمېږي.»
د بهرنیو چارو وزیر داسې مهال دا څرګندونې کوي چې د شنبې په ورځ د پاکستان پوځي رژیم د نامعقولو غوښتنو او ادعاو پر بنسټ، په استانبول کې د افغانستان او د ياد رژیم ترمنځ خبرې په ټپه ودرېدې.
له دې وروسته د ترکیې لوړپوړو چارواکو يو وار بيا هڅې پيل کړې چې د خبرو مېز ته د پاکستان پوځي رژیم را وګرځوي.
