بهرنيو چارو وزير د افغانستان او منځنۍ اسیا هېوادونو ترمنځ د مشورتي ناستې پرمهال خبرو کې له پاکستان سره لانجې ته هم اشاره وکړه.
مولوي امیرخان متقي وویل، له پاکستان سره د مذاکراتو په اړه د اسلامي امارت دريځ روښانه دی او د همدې دريځ په اساس غواړي چې له دې هېواد سره په پوره ريښتينولۍ لانجه حل شي.
د متقي په خبره، د همدې هدف ترلاسه کېدو لپاره افغانستان د چين په کوربهتوب له پاکستان سره خبرو ته ناست دی، خو که بیا هم پر افغانستان یرغل کېږي، د خاورې دفاع د افغانستان مشروع حق دی.
بهرنیو چارو وزیر وايي: « افغان حکومت په پوره صداقت او د حللارې په لټه کې له پاکستان سره په هغو مذاکراتو کې برخه اخستې چې دا مهال د چین په نوښت په “ارومچي” ښار کې روان دي. زموږ دریځ روښانه دی؛ اسلامي امارت تل د خبرو اترو او متقابل درناوي له لارې د ستونزو حل غواړي، خو په عین حال کې د خپلې ځمکنۍ بشپړتیا او ولس څخه د دفاع حق محفوظ ساتي.»
شنونکي که څه هم د چين په اورمچي کې روانو مذاکراتو ته هيلهمن دي، خو دا باور نه لري چې ګوندې پاکستان به په راتلونکي کې هلته پر کړو ژمنو وفا وکړي.
دوی وړانديز کوي چې اسلامي امارت دې ترې داسې تضمين واخلي چې د افغانستان او سيمې امنيت لپاره خطر ایجاد نه کړي.
د سیاسي چارو شنونکی نجیب الله جامع وايي: « موږ د چین مذاکراتو ته مثبته هیله مندي لرو، خو د پاکستان په خبرو او ژمنو باندې باور سخت او ناممکن دی. موږ له منځګړو هېوادونو غواړو چې د پاکستان له اړخه تضمین ورکړي، لیکلی سند ترې واخلي او په عین حال کې پاکستان ضمانت ورکړي چې خاوره یې د افغانستان د ثبات پر ضد نه کارول کېږي.»
ځينې نور شنونکي له کابل او اسلاماباد سره د بېجينګ ښو اړيکو ته په کتو نسبتاً باوري دي چې ښايي پاکستان يوې واقعي سولې ته په قانع کېدو سره پر افغانستان کړی يرغل جبران کړي.
د سیاسي چارو شنونکی شهزاده مسعود وايي: « چین په سیمه کې ستر هېواد دی او له پاکستان سره سټراټیژيک روابط لري او له افغانستان سره هم ښې اړیکې لري. پاکستان باید په لومړي سر کې د افغانستان له خلکو بښنه وغواړي؛ ځکه دوی د افغانستان پر حریم یې تېری کړی او په ځاني او مالي توګه یې زیانونه اړولي، باید دا زیانونه هم جبران کړي.»
د چارو شنونکی عبیدالله بهیر وايي: « منځګړی باید د یوه مفید درېیمګړي په توګه پر دواړو خواوو نفوذ ولري. چین ته د افغانستان له خوا په درنښت کتل کېږي، ځکه چې یو پیاوړی سیمه ییز او نړیوال حکومت دی.»
په اورمچي کې د افغانستان او پاکستان استازو ترمنځ له مذاکراتو څلور ورځې تېرېږي، خو تر اوسه يې جزئيات نه دي په ډاګه شوي.
د چیین بهرنیو چارو وزارت وايي، په دې مذاکراتو کې پرمختګونه شوي او ښکېل اړخونه د چين منځګړيتوب ته ارزښت ورکوي.
