د دولتي ادارو د یو کلنو لاسته راوړنو د تشرېح پرګرام په لړ کې، د چهارشنبې په ورځ بهرنیو چارو وزارت سرپرست مولوي امیرخان متقي د دې وزارت د یو کلنو کړنو او لاسته راوړنو راپور وړاندې کړ.
نوموړي د راپور وړاندې کولو پرمهال د کابل او واشنګټن د اړيکو موجوديت روښانه کړ او تایيد یې کړه چې سرپرست حکومت له امريکا سره وصل دی او وخت ناوخت د ځينو مسايلو په تړاو دواړه لوري ناستې هم کوي.
متقي د يادو اړيکو اډانه کې په واشنګټن کې د افغانستان سفارت د بيا فعالولو هڅو ته هم اشاره کوي او زياتوي، دغو هڅو له دې امله پايله نه ده ورکړې چې له امريکا سره تعامل او عادي کېدل وخت ته اړتيا لري.
متقي په دې اړه وايي: « موږ د امریکا له متحده ایالتونو سره په اړیکه کې یو او مخامخ دوه اړخیزې ناستې لرو. په امریکا کې د افغانستان د سفارت په اړه مو هم خبرې کړې دي، په ځانګړې توګه د کونسلي خدمتونو په اړه؛ خو تاسو پوهېږئ چې د متحده ایالتونو په څېر هېوادونه طبعا ً له افغانستان سره د خپلو تعلقاتو عادي کولو لپاره وخت ته اړتیا لري.»
د روسيې له لوري د اسلامي امارت د سرپرست حکومت رسميت پېژندنه د متقي د خبرو بل مهم ټکی و. نوموړی باوري دی چې دا رسميت پېژندنه هېڅکله د چا پر ضد عمل نه دی.
د بهرنیو چارو وزارت سرپرست وايي:« د روسیې له خوا رسمیت پېژندنه له نورو سره د ضد مانا نه لري؛ موږ له ټولو هېوادونو سره تعامل غواړو.»
دوې ورځې وړاندې ځينو پاکستاني رسنيو دې هېواد ته د مولوي اميرخان متقي د احتمالي سفر راپورونه خپاره کړل او تازه نوموړی هم د اګسټ په لومړيو کې پاکستان ته خپل سفر تایيدوي او وايي، هلته به له چارواکو پر شريکو سياسي او اقتصادي مسايلو وغږېږي.
د بهرنیو چارو وزارت سرپرست مولوي امیرخان متقي په دې اړه وايي: « موږ پاکستان ته د اګست میاشتې په لومړۍ اوونۍ کې سفر لرو او په دې سفر کې به د سیاسي مسایلو ترڅنګ، پر سیاسي او له پاکستان سره نورو تړلو مسایلو بحث کېږي او په تېرو مجالسو کې شویو پرېکړې به تعقیب شي.»
د بهرنیو چارو وزارت نور چارواکي وايي، په تېرو یوه کال کې څلورو هېوادونو جرمني، ناروې، هند او اندونیزیا ته ډېپلوماټان معرفي شوي او دا لړۍ د پراخېدو په حال کې ده.
د دوی په خبره، له هېوادونو سره د اقتصادي او سوداګریز تعامل په برخه کې هم پرمختګونه شوي او قناعت ورکړل شوی چې په سترو سیمه ییزو پروژو کې له افغانستان سره مشترک کار وکړي.
د دوی په خبره، افغانستان د آسیا د وصل پر نقطې د بدلېدو په حال کې دی.
د بهرنیوچارو وزارت د اقتصادي اړیکو رییس شفیع اعظم وايي:« د ټاپي پروژې عملي چارې په افغانستان کې روانې دي او تقریبا ً ۱۴ کیلومټره پایپ لین غځېدلی او تر ۶۰ کیلومټرو یې هوار کاري شوې ده. همدارنګه د کاسا زر پروژه هم شته ده.»
په ورته وخت کې د بهرنیو چارو وزارت چارواکي وايي، د تېر کال پرمهال د کونسلي خدمتونو په برخه کې بېلا بېل خدمات وړاندې شوي او هڅه کېږي چې دا خدمتونه لا زیات او معیاري شي.
د دې وزارت د کونسلي چارو ریاست وايي، په تېر یوه کال کې له ۱۷۰ زیاتو هېوادونو وګړو لپاره تر ۲۵۰ زرو وېزې صادرې کړې دي.
د بهرنیو چارو وزارت د کونسلي چارو رییس شعیب بریالی وايي: « د تېر کال په اوږدو کې موږ له ۱۷۶ هېوادونو اتباعو ته د افغانستان وېزې ورکړې دي. موږ یوازې تېر کال د افغانستان ۲۵۰ زره وېزې صادرې کړې دي.»
د بهرنیو چاو وزارت چارواکو دغه هم وویل چې په تېر یوه کال کې یې له هېوادونو سره د تعامل په برخه کې ګڼې لاسته راوړنې درلودې چې د روسیې له لوري د رسمیت پېژندنې ترڅنګ، د سیمې اکثریت هېوادونو په کابل کې سفارتونه پرانیستي او ګڼ شمېر لوېدیځ هېوادونه هم نیمه فعالې سیاسي استازولۍ لري.
