د افغانستان اسلامي امارت د بهرنیو چارو سرپرست وزیر مولوي امیر خان متقي د قطر پلازمینه دوحه کې د شنبې پر ورځ د «۱۴۰۱کال د چنګاښ پر ۱۱ مه» د افغانستان لپاره د یوشمېر هېوادونو له سفیرانو او استازو سره ناسته درلوده،چې د افغانستان په روان وضیعت په کې خبرې شوي دي.
د بهرنیو چارو وزارت مرستیال ویاند ضیاء احمد تکل پر خپله ټویټر پاڼه لیکلي،له لسو د زیاتو هېوادونو استازو او سفیرانو سره افغانستان کې په بشري،روغتیايي او تعلیمي وضیعت مهمه غونډه شوې.
تکل زیاته کړې:«قطر کې د بهرنیو چارو سرپرست وزیر امیر خان متقي له لسو د زیاتو هېوادونو له استازو او سفیرانو سره غونډه ترسره کړه،چې ناستو اړخونو په افغانستان کې د بشري او روغتیايي وضیعت ترڅنګ په تعلیمي برخه هم خبرې وکړې.»
اخوا د سیاسي چارو شنونکي بیا دا ډول ناستې نړیوالو سره د اسلامي امارت تعامل او ښو اړیکو لپاره ګتورې یادوي، او وايي،له دې سره به هغه جنجالي موضوعات،چې د نړیوالو او اسلامي امارت تر مېنځ موجود دي،حل شي.
د سیاسي چارو شنونکی عبداجبار اکبري وايي:« امیرخان متقي ته د افغانستان د بهرني سیاست په استازیتوب دو پیغامونه کولی شي وړاندې کړي. لومړی دا،چې اسلامي امارت تیار دی،څو له نړۍ سره تعامل ته کېني او دویم دا چې متقي د ځینو هېوادونو له سفیرانو سره مخامخ ناستې کړې او هلته د دواړو لورو غوښتنې مطرح شوې او دا کولی شي، چې د اسلامي امارت د رسمیت پېژندلو لپاره لاره هواره کړي.»
ځینې نور بیا په دې باور دي،چې له شته فرصته اسلامي امارت ښه استفاده ونه کړه او له نړیوالو سره یې د ښو اړیکو او تعامل برخه کې لټي کړې.
د سیاسي چارو شنونکی صفت ساپی وايي:« زه فکر کوم، چې د رسمیت پېژندنې پر موضوع لا تر اوسه پاتې دي. اوسنی حکومت پر دې نه دی توانیدلی،چې هغه پرمختګ وکړي یا هغه ځای ته ورسېږي، چې هغه نږدې او لرې هېوادونه پر دې قانع کړي،ترڅو دغه نظام پر رسمیت وپېژني. پر دې مانا،چې پر کوردننه باید داسې یو حالت رامنځته شي،چې له افغانستانه استازیتوب وکړی شي.»
د سیاسي چارو شنونکی حکمت الله حکمت بیا وايي:« د نړیوالې ټولنې او اسلامي امارت ترمنځ د باور کچه په بېلابېلو برخو کې تر ډېرې ټيټې کچې پورې رارسېدلې ده. نړیواله ټولنه د طالبانو د کورنیو سیاسیتونو له امله حاضره نه ده،چې رسمي اړیکې ولري. هېواد تر اوسه پورې دې ته حاضر نه دی او فکر نه کې چې په نږدې راتلوونکې به له طالبانو سره ډیپلوماتیکې اړیکې جوړې کړي.»
قطر ته د افغان چارواکو له سفر هیلې وې،چې د ګنګل شو پېسو ښو اړیکو او تعامل برخه کې پرمختګ ترسره شي، هغه څه چې شنونکي یې ناهیلي کړي.
اخوا بیا دذ بهرنیو چارو وزارت وايي، د نړۍ د ځینو هېوادونو له استازو او سفېرانو سره یې ناستې خورا مهمې وې،چې په افغانستان کې په بشري مرستو، تعلیم او روغتیا برخه کې ګټورې خبرې شوي.
وړاندیزونه بیا دا دي،چې د افغانستان اسلامي امارت باید پر کور دننه د مشروعیت تر څنګ په ځینو برخو کې نرمښت وښايي، تر څو نړیوال ورسره د تعامل او اړیکو برخو کې خپلې دروازې پرانيزي.
