د بهرنيو چارو وزارت سرپرست مولوي امیر خان متقي د وزارتونو ویاندویانو، مطبوعاتي مسوولینو، او د خواله رسنیو فعالانو سره کتلې دي.
دا ناسته چې ګډونوالو ته د سرپرست حکوت د پالېسيو او فعاليت روښانه کولو په تړاو جوړه شوې وه، متقي په کې وویل، دوه ډوله مسوولین یا د خواله رسنيو فعالان شتون لري، چې یوه برخه یې د پالیسۍ پر بنسټ فعالیت کوي او بله ډله يې بیا خپل شخصي فکر او عقدې پالي او د شهرت ترلاسه کولو په موخه کار کوي.
هغه زیاتوي:« خبره دا ده، چې موږ او تاسې دوه قسمه مسوولین او د سوشل میډیا فعالان لرو، یو هغه څوک دي، چې د اسلامي ا مارت پالیسي بیان کوي، اطاعت کې چلېږي، یوازې د خپل فکر او جذباتو تابع نه دي، بل هغه څوک دي چې شخصي کیسې پر مخ بیايي، عقدې پالي، د شهرت لپاره بیانونه ورکوي، نو تاسې باید د هغه چا تابع واوسئ، هغه څوک تایید کړئ، هغه څو وستایئ، چې هغه د اسلامي امارت پالیسي پر مخ بیايي. موږ او تاسې مسلمانان یو، د اطاعت پابند یو، د پالیسۍ پابند یو، ډېره وخت داسې پېښ شي، چې د شخصي افکارو، د شخصي شهرت لپاره په خلکو پیسې چک چکې کوو. ولې دا دومره شهیدان، دا دومره قربانۍ، دا دومره ستړیاوې چې تېرې شوې، دا د یوه شخص لپاره وې.»
متقي د دولتي ادارو له ویاندیانو او د ټولنیزو رسنيو له فعالانو غوښتي، چې د ناسمو مطالبو، د سرپرست حکومت او ملي ګټو له خلاف نشراتو ډډه وکړي او ټول باید د ملي ګټو او اسلامي ارزښتونو په چوکات کې خپل فعالیتونو ته دوام ورکړي.
متقي دغه راز ویاندیانو ته په خطاب کې وویل، رسنیو ته د مالوماتو ورکولو په برخه کې ځانګړې پالیسۍ نشته او کوم موضوعات چې رابرسېره کېږي، ټول ویاندیان دې د سرپرست حکومت له مرکزي ویاند او بهرنیو چارو وزارت اعلامیې ته انتظار وباسي او د دوی له مالوماتو وروسته دې له رسنيو سره خبرې وکړي.
هغه زیاته کړه:« که هغه د فلسطین موضوع وي، که هغه د ملګرو ملتونو په اړه خبرې وي، که هغه د بشري حقونو خبره وي، که هغه د اسلامي نړۍ موضوعات وي، که هغه له ګاونډیانو سره اړیکې وي،که هغه د ځېنو جنجالونو په اړه وي، د ځېنو پرمختګونو په اړه وي، په ټولو کې اعلامیې ورکول کېږي، همدغه پالیسي ده، پالیسي ټولو جزئیاتو ته جوړېدی نه شي، ځکه ورځ په ورخ نوي حوادث راځي، ته به له هغو سره څه کوې؟ نو غوره پالیسي دا ده، که د اسلامي امارت مشرتابه، مرکزي ویاند، د بهرنیو چارو وزارت دوی سکوت غوره کړی وه، ته هم سکوت غوره کړه او که هغوی څّه ویلي ول، د هغوی په رڼا کې ته هم څه ووایه، نو هم به پالیسي یوه شي، هم به بې اطاعتي نه راځي او هم به هر څوک په خپل سر باندې لګیا نه وي.»
نوموړی دغه راز له خلکو سره پر نرم چلن هم ټینګار کوي او وایي، ټول ویاندیان ملکف دي چې یوه موضوع باید په ښه ډول سره وڅېړي او وروسته له رسنیو سره په حقایقو ولاړ مالومات شریک کړي، څو د خلکو باور نور هم خپل کړي.
له دې وړاندې یو شمېر خبریالانو او د رسنیو ملاتړو بنسټونو اطلاعاتو ته د نه لاسرسي له امله شکایت کړی او ادعا کوي، چې د ځینو وزارتونو او ادارو ویاندویان له رسنیو سره پر وخت همکاري نه کوي او اطلاعاتو ته نه لاسرسي دوی له ګڼو ستونزو سره مخ کړي.
