په روسیه کې د مسکو فارمټ شپږمې ناستې له پای ته رسېدو وروسته، د بهرنیو چارو وزارت سرپرست مولوي امیرخان متقي د ناستې په څنډه کې د چین، ایران، هند، ازبیکستان او پاکستان له ځانګړو استازو سره پر دوه اړخیزو مسایلو خبرې کړې.
د بهرنیو چارو وزارت وزارت وايي، په دې لیدنو کې د یادو هېوادونو له استازو سره د سیاسي او اقتصادي دوه اړخیزو اړیکو پر ودې او همکاریو تمرکز شوی.
د وزارت په خبره، په دې دوه اړخیزو ناستو کې افغان لوري په هېواد کې راغلی امنیت د سیمې پر ګټه بللی او له اسلامي امارت سره د تعامل د زیاتېدو او له افغان لوري سره د سوداګریزو همکاریو او د پانګونو د پراخوالي غوښتنه یې کړې.
وزارت زیاته کړې:« په دې ناستو کې د افغانستان او سيمې هېوادونو ترمنځ پر دوه اړخيزو سياسي اړيکو او اقتصادي همکاريو هراړخيزې خبرې وشوې. د بهرنيو چارو وزارت سرپرست د يادو هېوادونو له ځانګړو استازو سره په ليدنه کې د افغانستان او اړوندو هېوادونو ترمنځ د اقتصادي همکاريو پر پراختيا، سوداګرۍ او پانګونې ټينګار کړی.»
په تېرو درېیو کالو کې له سرپرست حکومت سره د لویدیځو هېوادونو پرتله د سیمې او ګاونډ هېوادونو اړیکې په ښه حالت کې دي او ډېر کله یې د سیاسي او اقتصادي همکاریو ژمنې کړې.
د سیاسي چارو شنونکي په داسې شرایطو کې چې اسلامي امارت د هېڅ هېواد له لوري پر رسمیت نه دی پېژندلی شوی، ورته سیمه ییزې ناستې له هېوادونو سره د خبرو اترو او ګډو ستونزو ته د حل لارو موندلو لپاره یو فرصت ګڼي.
د چارو شنوونکی ادریس محمدي ځاځی وايي: « دا ډول غونډې او کنفرانسونه کولی شي د نړیوالو سازمانونو، خیریه بنسټونو، سوداګرو، پانګوالو او سیاستوالو پاملرنه افغانستان ته واړوي، افغانستان د موضوعاتو په محراق بدل کړي؛ ترڅو د افغانستان د رسمیت پېژندنې، سیاسي تعامل او د کنګل شوې شتمنۍ د خلاصولو لپاره هڅې وشي.»
د شنونکو په باور، که اوسنی سرپرست حکومت وکولی شي دغه هېوادونه تعامل ته چمتو کړي، د افغانستان ترڅنګ د سیمې هېوادونو اقتصادي وضعیت هم ورسره غوړېدای شي.
د سیاسي چارو شنونکی سلیم پیګیر وايي: « افغانستان د منځنۍ آسیا او سوېلي آسیا د نښلولو ټکی دی. د سوېلي او منځنۍ آسیا له استازو سره د امیرخان متقي لیدنې او خبرې د دې مانا لري چې دغه هېوادونه غواړي خپلې اړیکې پراخې کړي او دا له افغانستان پرته ناشونې دي.»
روسیه وړمه ورځ د افغانستان په تړاو د سیمې د یو شمېر هېوادونو د استازو په ګډون د مسکو فارمټ د شپږمې ناستې کوربه وه. په دې ناسته کې د افغانستان د سیاسي ښکېلتیا او اقتصادي وضعیت په تړاو بحث وشو.
د بهرنیو چارو وزارت سرپرست مولوي امیرخان متقي د همدې ناسې په څنډه کې د روسیې له بهرنیو چارو وزیر سرګې لاوروف سره دوه اړخیزه ناسته درلوده چې په کې پر سیاسي او اقتصادي موضوعاتو خبرې وشوې.
