د بهرنيو چارو وزارت سرپرست مولوي امیرخان متقي متحده عربي اماراتو ته د خپل سفر په لړ کې د دې هېواد د اقتصاد له وزير سره لیدلي او دواړو په افغاستان کې د پانګونې پر رامنځته شویو فرصتونو سربېره، پر سوداګريزو همکاریو، د کانونو پر استخراج، د کرنې پر مکانیزه کولو، کرنیزو محصولاتو ته پر بازار موندنې، د سوداګرۍ پر اسانولو او پراختيا او عربي اماراتو ته د کارګرانو پر لېږلو بحث کړی.
د بهرنیو چارو وزارت مرستیال ویاند ضيا احمد تکل وايي: « په دې کتنه کې د کانونو د استخراج، د کرنې مکانیزه کولو، په سوداګرۍ کې د اسانتیاوو په رامنځته کولو، د دواړو هېوادونو ترمنځ د سوداګرۍ او ټرانزیټ پراختیا، اماراتو ته د افغان کارګرانو د لېږلو، د بانکي اړیکو د عادي کولو او د سوداګرۍ خونو ترمنځ د همکاریو په باب هر اړخیز او تفصیلي بحثونه ترسره کړل.»
د متحده عربي اماراتو د اقتصاد وزیر بیا د افغانستان او اماراتو ترمنځ د سوداګرۍ پر پراختیا ټینګار کړی او ترڅنګ يې دواړو لورو هوکړه کړې چې ياد هدف ته د رسېدو لپاره به د پروګرامونو تطبيق په موخه تخنيکي ټيمونه وګوماري.
د بهرنیو چارو وزارت مرستیال ویاند په دې اړه وايي: « د دغې ناستې په پای کې دواړو لورو هوکړه وکړه چې د یادو مواردو د ښه تطبیق لپاره به تخنیکي ټیمونه ټاکي؛ ترڅو یاد پروګرامونه په اغېزمن ډول عملي شي او د دواړو هېوادونو اقتصادي اړیکې لا پياوړې کړي.»
له دې سره په یوه وخت، سوداګر د متحده عربي اماراتو له لوري د وېزو په صادرولو کې د ستونزو له امله شکايت کوي او له سرپرست حکومته غواړي چې له ياد هېواد سره دغه او د دوی نورې ستونزې حل کړي.
سوداګر عزتالله نیازی وايي: « دغه د وېزو په برخه کې له څه مودې راهیسې مشکلات دي. هیله مو دا ده کوم پلاوی چې د متقي صاحب پر مشرۍ اماراتو ته راغلی، د وېزو په برخه کې هم له اړوند ادارو او چارواکو سره خبرې وکړي او ترې وغواړي چې دا ستونزه حل کړي.»
که څه هم سرپرست حکومت په تېرو درې نیمو کالو کې له متحده عربي اماراتو سره فعالې ډیپلوماتیکې اړیکې درلودې، خو تر اوسه یې هم پر رسمیت نه دی پېژندلی.
د اقتصادي چارو کارپوهان دا ډول لیدنې د افغانستان او متحده عربي اماراتو په ګټه بولي او ټینګار کوي، چې له عربي هېوادونو سره د سیاسي او اقتصادي اړیکو پیاوړتیا سره به افغاني توکو ته بازار موندنه وشي.
د اقتصادي چارو کارپوه عبدالنصیر رشتیا وايي: « موږ باید هڅه وکړو د خپلو داخلي تولیداتو د فروش لپاره په خلیج هېوادونو کې نوي بازارونه رامنځته او پيدا کړو.»
د اقتصادي چارو کارپوه عبدالجبار ساپی وايي: « دغه لیدنې او د پانګونې لپاره هڅې پر اقتصادي سکټور مثبت اغېز لري او نورو نړیوالو پانګوالو ته لاره هواروي.»
له دې مخکې د اسلامي امارت او د هند د بهرنیو چارو وزارتونو چارواکو هم په ګډه لیدنه کې د سیاسي او اقتصادي اړیکو د پراختیا ترڅنګ، پر ګڼو دوه اړخیزو موضوعاتو خبرې کړې وې.
د بهرنیو چارو وزارت سرپرست هندي لوري ته له افغان خاورې د هر راز امنیتي ګواښ نه پېښېدو ډاډ ورکولو ترڅنګ، له ياد هېواد سره د ډېپلوماټیکو او سوداګریزو اړیکو د پراختیا غوښتنه کړې وه.
