د مسکو فارمټ د ۷مې غونډې ګډونوالو هېوادونو استازو په يوه ګډه اعلاميه کې ټینګار کړی چې افغانستان او شاوخوا هېوادونو کې د هېڅ هېواد پوځي حضور د منلو نه دی او دا د سیمې امنیت او ثبات ته زیان رسوي.
دوی له هغو هېوادونو چې د افغانستان د اوسني وضعیت مسوول دي غوښتنه کړې چې د افغانستان بیارغونې او راتلونکي پرمختګ په برخه کې خپلې ژمني عملي کړي.
د مسکو فارمټ په دې غونډه کې ګډونوالو د یوه خپلواک، یو موټي او سوله ییز هېواد په توګه د افغانستان د ملاتړ اعلان کړی.
په دې غونډه کې د افغانستان د بهرنيو چارو وزير ويلي، په افغانستان کې وسله والې ډلې ځپل شوې او له ګډونوالو هېوادونو يې غوښتي چې له دې فرصت څخه د سيمې دايمي ثبات او امنیت لپاره ملاتړ وکړي.
بهرنیو چارو وزیر امیرخان متقي زیاته کړې: « لومړی باید دا واضحه وي چې زموږ او ستاسو سیمه کې د امنیت موضوع د اسلامي امارت له راتګ سره نه ده را پیدا شوې. د دې سیمې امنیتي موضوعات تر څلورو لسیزو زیات تاريخ لري. تېر شل کاله په افغانستان کې بهرنی حضور او له دې غیر مشروع حضور سره د سیمې د ځینو هېوادونو همکاري د امنیتي ستونزو د جوړېدلو اساسي لامل وو چي له نېکه مرغه په تېرو څلورو کلونو کي د ناامنۍ ټول عوامل په افغانستان کي له منځه تللي. زموږ نظر دا دی چې دې مثبت پرمختګ سره همکاري وشي او لا ښه مدیریت شي؛ تر څو بیا پخوانۍ تېروتنې تکرار او دغه راز زموږ سیمه بیا د تېرو محاسبو او نیمګړو پالیسیو له امله د ناامنۍ قرباني نه شي.»
د بهرنیو چارو وزیر په افغانستان کې د وسله والو ډلو شتون په کلکه در کړی او ویلي یې دي چې ځینې هېوادونه غواړي خپل مسوولیت پر افغانستان بار کړي او نړۍ ته یې د یوه خطر په توګه معرفي کړي.
د بهرنیو چارو وزیر په دې اړه زیاته کړه: « تاسي ته معلومه ده چې څه موده وړاندې د څو هېوادونو ګډه اعلامیه خپره شوه چې په کې افغانستان کې د بېلا بېلو ډلو د شتون موضوع مطرح شوې وه. غواړم په ډېر واضح ډول ووایم چې افغانستان کې هېڅ داسې ډله شتون نه لري چې د افغانستان له خاورې په استفادې نورو هېوادونو ته ستونزې جوړې کړي. هیله ده چې له ناامنۍ د ځورېدونکو هېوادونو مسوولین خپل مسوولیت په خپله اوږه واخلي. زه په ډېر تأسف سره وایم چې ځینې لوري فعاله هڅه کوي چې په تېرو څلورو کلونو کې د راغلې ارامۍ او امنیت د ستایلو پر ځای، افغانستان سیمې ته د خطر په حیث معرفي کړي. زه دغه هڅې په کلکو ټکو غندم او له ټولو هېوادونو غواړم چې د افغانستان په قضیه کې د عیني واقعیتونو او خپلو معلوماتو په رڼا کې مستقل دریځ خپل کړي؛ تر څو وتوانېږو د سیمې مشکلاتو ته عملي او مؤثره تګلاره خپله کړو.»
د بهرنیو چارو وزیر د داعش او نورو وسله والو ډلو د مرکزونو په اړه وویل چې د دغو مرکزونه د سیمې په نورو هېوادونو کې دي او افغانستان له دې امله اندېښنه لري.
متقي زیاته کړه: « زموږ اطلاعات دا دي چې په دې وروستیو کې داعش او ځینو نورو ډلو د سیمې په نورو هېوادونو کې د تجهیز او روزنې مراکز جوړ کړي چې د افغانستان حکومت ته د نګرانۍ او تشویش وړ دي.»
د بهرنیو چارو وزیر د نشه يي توکو پر کرکیلې بندیزونو ته هم اشاره وکړه او وویل، په افغانستان کي د مخدره موادو د کښت له بندیدو سره له افغانستانه د باندي په بیساري ډول د مخدره موادو کښت، تولید او قاچاق زیات شوی او د سیمې هیوادونه باید په خپلواکه توګه د دغو موضوعاتو په اړه څېړنې وکړي.
