متقي: د افغانستان اوسني بهرني سیاست معیار اسلامي ارزښتونه او ملي ګټي دي 

د افغانستان  اسلامي امارت  د بهرنیو چارو سرپرست وزیر مولوي امیر خان متقي ویلي، هېڅ کله به هم د نورو ګټو لپاره خپل ولس او هېواد قرباني نه کړي او د هېوادونو ترمنځ په متوازن بهرني سیاست باور لري

متقي ویلي، د بهرني سیاست معیار یې اسلامي ارزښتونه او د هېواد ملي ګټې ټاکلي دي او له متقابلو لوریو سره پر همدې اساس مخکې ځي. 

متقي زیاته کړې:« موږ له هېڅ چا سره کار نه لرو. غوره متوازن بهرنی سیاست موږ په کار اچولی دی او خپلې اسلامي او ملي ګټو مو معیار ګرځولي دي، نه د افغانستان خاوره ،حکومت او ولس د چا د ګټو لپاره قرباني کوو او نه د هغوي  د ګټو لپاره د بل پرخلاف  اقدامات کوو .» 

د بهرنیو چارو سرپرست وزیر ویلي، ورځې بلې ته کابل کې د هېوادونو سفارتونو شمېر زیاتیږي او ګڼو هیېادونو ژمنه کړې ده،چې خپل سیاسي استازي به کابل ته رالیږي. 

دغه راز متقي ویلي،کله چې افغان ډیپلوماتیک پلاوی بهر ته ځي او یا هم بهرنیان کابل ته راځي ،تعامل یې ورسره رسمي دی. 

هغه زیاته کړې:« له نړۍ سره مو تعامل داسې دی،چې ورځ په ورځ کابل کې سفارتونه خلاصیږي،سربېره په هغو سفارتونو،چې د اکسټ ۱۵ مې له تحولاتو وروسته هم په کابل کې پاتې شول،د سعودي عربستان ،متحده عرب اماراتو سفارت کابل ته راغی، په دې وروستیو کې د هندوستان سفارت راغی،همداسې نورو هېوادونو هم ژمني کړي دي،چې سفارتونه به یې کابل ته راځي. دا یو پرمختګ دی. زموږ او ستاسو پلاوي که بهر ته ځي او که څوک له بهره راځي تعامل مو له یوبل سره رسمي دی.» 

متقي چې په بهرنیو چارو وزارت کې افغان دیپلوماتو ته وینا کوله وویل ټول سوداګریز بندرونه مو خلاص دي اوسوداګري په سمه توګه پرمخ روانه ده  او د افغانستان ترانزیټ د ځواکمنتیا په حال کې ده،چې دعواید له زیاتوالي سره مرسته کوي.