متقي د اسلامي همکاریو سازمان له مرستیال سره وکتل 

د افغانستان اسلامي امارت د بهرنیو چارو وزارت سرپرست امیر خان متقي د یکشنبې پر ورځ د « ۱۴۰۰ کال د کب پر ۱۵ مه» په کابل کې د اسلامي همکاریو سازمان له مرستیال طارق علي بخیت سره لېدنه کړې. 

د یاد وزارت له لوري په خپره شوې خبرپاڼه کې راغلي، په دې لېدنه کې د اسلامي همکاریو سازمان مرستیال د خپل سفر هدف د افغانستان په تړاو د یاد سازمان د ترسره شوي کنفرانس د شویو پرېکړو تعقیب بللی او له افغانانو سره پر بشري، پراختیایي مرستو او ښوونیز بهیر هم خبرې شوې دي.

خبرپاڼه کې وړاندې راغلي، په دې لیدنه کې د اسلامي همکاریو سازمان مرستیال ویلي، د افغانستان ملاتړ کوي او د افغانانو اړتیاوې ورته لومړیتوب لري، چې د پوره کېدو لپاره یې په کابل کې خپل دفتر پرانیستی دی.

په ورته وخت کې متقي کابل کې د اسلامي همکاریو سازمان د دفتر له پرانیستې هرکلی کړی دی او له دغه سازمانه یې غوښتي دي،چې د افغانستان د کنګل شوې شتمنۍ خوشې کېدو لپاره هڅې وکړي.