د اسلامي امارت د بهرنیو چارو وزارت سرپرست چې په کامرون هېواد کې د اسلامي همکاریو سازمان د بهرنیو چارو وزیرانو په ۵۰ مې ناسته کې ګډون ته ورغلی و، دغې ناستې ته له وینا سربېره یې په څنډه کې د ګڼو سیمه ییزو او ګاونډیو هېوادونو له استازو سره جلا جلا لېدنې کړې.
مولوي امیرخان متقي د سعودي عربستان، ترکیې، فلسطین، سومالیا، آذربایجان، قطر، عمان، اندونیزیا او ایران هېوادونو له استازو سره لیدلي او پرمهمو مسایلو یې خبرې کړې دي.
د بهرنیو چارو وزارت د اعلامیې په خپرولو سره ویلي، په دغو لیدنو کې د دوه اړخېزو اړیکو پر پیاوړتیا او همدا راز د ګډو همکاریو لپاره د نویو فرصتونو په رامنځ ته کولو بحثونه شوي.
د سیاسي چارو کارپوهان دغه ډول ناستې او لیدنې د افغانستان لپاره ګټورې یادوي او زیاتوي چې باید فرصتونه ضایع نه شي.
دوی په دې باور دي چې نه یوازې د اسلامي همکاریو سازمان غړي هېوادونه بلکې نوره نړۍ هم باید له افغانستان سره تعامل ته را وړاندې شي او افغان چارواکو ته دا فرصت ورکړي چې له دوی سره ناستې ولري.
د سیاسي چارو کارپوه حکمت الله حکمت وايي: « زموږ هیله دا ده چې د اسلامي همکاریو سازمان، ملګري ملتونه او نور نړیوال سازمانونه له افغانستان سره مثبت تعامل ته لاړ شي، د افغانانو حقوق پر رسمیت وپېژني. متقي نه یوازې د اسلامي همکاریو سازمان په ناسته کې بلکې په ټولو نړیوالو غونډو کې د افغانستان په استازیتوب هغه څه وايي چې زموږ ملي ګټې یې ایجابوي.»
خو ځینې نور بیا په دې باور دي چې دغه لیدنې به هغه مهال نورې هم زیاتې او له هېوادونو سره د اوسني نظام اړیکې لا پسې نږدې او پیاوړې شي کله چې حکومت له سرپرستۍ حالته راووځي، قانوني بڼه خپله کړي، کورنی مشروعت ترلاسه او ورپسې نړیوال مشروعیت ته لار هواره شي.
د پوهنتون استاد فیض محمد ځلاند وايي: «وینو چې د سیمې هېوادونه له موږ سره اقتصادي راکړه ورکړه کوي، خو سیاسي تعامل نه کوي. وینو چې د سیمې هېوادونه خپلې اندېښنې او فشارونه پر موږ زیاتوي، خو موږ هغه اندېښنې او فشارونه نه شو واردولی چې موږ یې لرو. دا ټول په دې پورې اړه لري چې موږ څنګه کولی شو خپل دولت، خپله عامه اداره او خپل جوړښت قانونمند کړو، کورنی کار ترسره کړو، ولسي پوهاوی او ملاتړ ترلاسه کړو او په ټوله کې د کورني مشروعیت له لارې نړیوال مشروعیت ترلاسه کړو.»
د سیاسي چارو کارپوه شهزاده معسود بیا وايي، دا زیاته مهمه ده چې افغانستان یو ځل بیا د نړیوالې ټولنې د فعال غړي په توګه ومنل شي او دغې موخې ته د رسیدو لپار اړینه ده چې سرپرست حکومت په کور دننه یو شمېر هغه چارې ترسره کړي چې نړۍ او افغان ولس ته مهمې دي.
مسعود زیاتوي:« اړینه ده چې له نړیوالې ټولنې سره د یوه مثبت تعامل له لارې د تفاهم ژبه پیدا شي. افغانستان د نړیوالې ټولنې یو فعال غړی و او دی. زه هیله لرم، چې د نجونو د زده کړو په څېر زموږ کورنيو او ملي مسایلو ته د حل معقوله لار پيدا شي ،ترڅو نورو ته هېڅ بهانه پاتې نه شي.»
د بهرنیو چارو وزارت سرپرست مولوي امیرخان متقي د اسلامي همکاریو سازمان د بهرنیو چارو وزیرانو ۵۰۹ مې ناستې ته چې د کامرون هېواد په پلازمېنه یاوندي کې جوړه شوې وه، په خپلو خبرو کې وویل، د امریکا د افغاستان میلیاردونه ډالر شتمني کنګل کړې، اقتصادي بندیزونه یې لګولي او د حکومت پر وړاندې تبلغاتي جګړه کوي.
متقي د یاد سازمان له غړو هېوادونو وغوښتل چې د دغو ستونزو د حل په برخه کې ورسره مرسته وکړي.
