د بهرنیو چارو وزارت سرپرست مولوي امیرخان متقي په کابل کې د بهرنیو هېوادونو سفیرانو او د نړیوالو سازمانونو استازو سره ګده ناسته کې ویلي، په افغان خاوره کې د ټاپي ګازو نل لیکې د عملي کار پیل په حقیقت کې په سیمه کې له جګړې او سیالۍ څخه د پرمختګ او همکارۍ پر لور د بحث بدلون دی.
متقي د دې سترې پروژې د غځولو په برخه کې د اسلامي امارت سیاسي اراده کلکه بللې او هیله یې څرګنده کړې چې د یادې پروژې په بشپړېدو سره به د پاکستان او هندوستان ولسونه هم له دغه اسانتیا برخمن شي.
هغه زیاته کړې: « ټاپي یوازې افغانستان پورې اړه نه لري بلکې افغانستان د نل لیکې په شریکانو کې تر ټولو کمه اندازه ګاز ترلاسه کوي. د دې نل لیکې دوه نور مهم شریکان هند او پاکستان دي. موږ هیله لرو چې د ټولو شریکانو په همکارۍ یوه ورځ د دې لیدونکي اوسو چې ټاپي تر خپل منزل ورسېږي.»
امیرخان متقي له ګډونوالو غوښتنه کړې چې د خپلو هېوادونو او ولسونو د هوساینې او پرمختګ لپاره باید د منفي سیالیو پر ځای مشترکو ګټو ته مخه کړي.
متقي ویلي: « د دغو پروژو پرانیسته او بشپړتیا به په سیمه کې ستر اقتصادي بدلون راولي. دا د ګټې – ګټې حالت یو ښه مثال دی چې موږ به یې په ښه نیت لید لوري پیلوو.»
د بهرنیو چارو وزارت سرپرست بهرني هېوادونه او شرکتونه په افغانستان کې پانګونې ته رابللي او زیاته کړې یې ده چې اوس د نړۍ ګڼ هېوادونه دې پایلې ته رسېدلي چې د جیوپولیټیک لیدلوري پر ځای کولی شي سیمه ییزو مسایلو ته له اقتصاد محوره زاویې وګوري او په پای کې ټول ګټونکي شي.
د ده په خبره، افغانستان کې د سیمې هېوادونو لپاره د پانګونې ښه فرصت رامنځ شوی او سرپرست حکومت په دې برخه کې هر راز همکاریو ته چمتو دی.
د بهرنيو چارو وزارت سرپرست زیاته کړې: « دا د دې څرګندونه کوي چې افغانستان به په راتلونکې کې د اتصال او اقتصاد مرکز وي، جګړې او نا امنۍ به په کې نه وي.»
د بهرنیو چارو وزارت د سرپرست په خبره، د سترو اقتصادي پروژو له پیل کېدو سره به سیمه کې ستر مثبت اقتصادي بدلون راشي او د ټولو ښکېلو هېوادونو اقتصاد به ورسره وغوړېږي.
په دې ناسته کې د ترکمنستان سفیر هم خبرې کړې او د افغانستان او ترکمنستان ترمنځ یې د سترو پروژو پرانیسته د دواړو هېوادونو په اړیکو کې د نوي فصل پیل یاد کړی او په خبره یې، ترکمنستان غواړي له افغانستان سره سیاسي او اقتصادي اړیکې لا پراخې کړي.
