د بهرنیو چارو وزارت سرپرست مولوي امیر خان متقي عمان هېواد ته د خپل څو ورځيني رسمي سفر په لړ کې د دې هېواد چارواکو او د خصوصي سکټور له استازو سره په جلا جلا لیدنو کې ویلي، اسلامي امارت یو متوازن سیاست غوره کړی او په خبره یې، د یوه هېواد د خوښۍ لپاره د بل هېواد پر وړاندې نه جنګېږي.
امیرخان متقي له ټولو هېوادونو سره د اسلامي امارت تعامل د افغانستان د ګټو پر بنسټ یاد کړی او ټینګار یې کړی چې له نا سالمو رقابتونو راوتلی افغانستان به د هېوادونو ترمنځ د ارتباطي پل رول ولوبوي.
متقي په دې اړه وايي: « د متوازن سیاست مانا دا ده چې د یوه هېواد د خوشالۍ لپاره له بل هېواد سره نه جنګېږو، د یوه هېواد د خوشالۍ لپاره د بل هېواد مخالفت نه کوو، بلکې له ټولو سره نارمل اړیکې غواړو. افغانستان یو جګړه ځپلی او غریب هېواد دی او ډېرې ستونزې یې لیدلې دي. اوس د دې توان نه لري د نړۍ په مقابلو کې ورګډ شي. »
متقي د افغانستان دننه د دولت ضد ډلو په تړاو ویلي، په ۴۰۰ ولسوالیو کې د اسلامي امارت ضد ډلې په یوه لوېشت خاوره هم حاکمېت نه لري او په وینا یې د اسلامي امارت په حاکمېت سره افغانستان کې د قدرت جزیرې له منځه وړل شوې دي او یو مرکزي نظام حاکم دی.
متقي دغه راز ویلي، هېڅ چارواکی د څوکۍ، قدرت او ګټې وټې پر سر اختلاف نه لري بلکې ټول چارواکي او مسوولین د خپل مشرتابه اطاعت عملي کوي.
د بهرنیو چارو وزارت سرپرست زیاته کړې: « نه د اختلافونو خبره شته، نه د ګډوډیو خبره شته، نه د بد امنیو خبره شته. دا هر څومره تبلیغات چې کېږي، په عمل کې تاسو وینئ چې نه په کابل کې کومه پېښه شته او نه هم په نورو ولایتونو کې. دا ټولې د ثبات نښې، سوکالۍ او خوشالۍ نښې دي.»
تر دې مخکې هم د سرپرست حکومت ځينو چارواکو د اسلامي امارت د چارواکو ترمنځ د اختلافونو د شته والي ادعا رد کړې او هغه یې د سرپرست حکومت پر وړاندې منفي تبلیغات ګڼلي وو.
که څه هم تر اوسه اسلامي امارت د هېڅ هېواد له لوري پر رسمیت نه دی پېژندل شوی، خو د چین، روسیې، ترکیې، پاکستان، ایران او قطر په شمول یو شمېر هېوادونه په کابل کې ډېپلوماټیک فعالیت لري.
