د امريکا د بهرنيو چارو پخواني وزیر مایک پمپيو یوې مرکې کې ویلي، افغانان دې خپله راتلونکې خپله وټاکي، هغه څه چې، ددوی ژوند یې ننګولی پر وړاندې دیې مبارزه وکړي او زیاته کړې یې ده، چې افغانان دې بهر هېوادونو ته د تګ پر ځای توپک ته لاس کړي او طالبانو سره دې جګړه وکړي.
پمپيو زیاته کړه:« وړمه ورځ مې ټلوېزيون کې يو ځوان وليد،چې ۲۲ يا ۲۳ کلن به و، ويل يې، افغانستان کې پاتې کېدل ګواښوونکي دي او غوښتل يې بهر ولاړ شي. هغه بايد د دې پر ځای د طالبانو پرضد د جنګ لپاره د ام ۱۶ ټوپک غوښته کړې وای.»
په ورته وخت کې پمپيو وايي،که افغانان د خپلې ازادۍ لپاره هېله نه لري، نو دوی اړتيا نه لري، چې افغانستان ته د جګړې لپاره سرتېري ولېږي.
هغه زیاتوي:« که چېرې افغانان د خپلې ازادۍ لپاره د جګړې هېله نه لري، موږ اړتيا نه لرو، چې د جګړې لپاره افغانستان ته سرتېري ولېږو.»
پمپيو ويلي، هېواد يې په تېرو شلو کلونو کې افغانستان کې ميلياردونه ډالر مصرف کړي او افغان ځواکونو ته يې ښه پوځي روزنه ورکړې او کولی شي، چې له خپلې خاورې دفاع وکړي.
هغه زیاته کړه:« اوس د دې وخت دی،چې دوی پر مخ ولاړ شي او ځانته امنيت راولي. زه باوري يم، چې دا کار کولی شي. دا د دوی نيت پورې اړه لري،چې ايا دوی هغه څه کول غواړي، چې غواړي يې او اړتيا ورته لري؟ دوی وايي، سوله ييز افغانستان غواړي او غواړم افغانان ښه پرېکړه وکړي.»
پمپيو دا خبرې داسې مهال کوي چې له نږدې يوه کال ځنډ وروسته دوحه کې د افغان حکومت او طالبانو ترمنځ د سولې دریدلي مذاکرات نن بیا پيل شول.
