د مالیې وزارت د ګمرکونو لوی ریاست وايي، هر ورځ په کابل او ولایتونو کې شاوخوا زر عرادې موټر ثبتېږي او تر دې دمه شل زره او دوه سوه عرادې موټر ثبت شوي دي.
د بې اسناده موټرو د ثبت له پروسې یوه میاشت او لس ورځې تیرېږي خو تر اوسه ۲۰۲۰۰ موټر ثبت او له دې شمېرې ۷۵۰۰ موټر محصول شوي دي.
د ماليې وزارت د ګمرکونو لوی ریاست وايي، د ۷۵۰۰ موټر د محصول له درکه ۴۵۰ میلیونه افغانۍ عواید راټول شوي دي.
د کابل په ګمرک کې بیا یو شمېر مراجعین نیوکه کوي چې پروسه شفافه نه ده او د بې اسناده موټرو د قانوني کولو لپاره ټاکل شوی وخت هم په ختمېدو ده.
یو تن مراجعه کوونکی وایي، ((له سهاره تر ماښامه یوازې هغه خلک خپل کار مخ ته بیولی شي چې یا واسطه ولري، کمېشن کار ولري او یا د ګمرګ په دننه کې کوم مامور وپیژني. د کمېشن کارانو کارونه مخ ته وړل کېږي، خو د بې وزلو څوک پوښتنه نه کوي.))
خو د ګمرکونو لوی ریاست د موټرو مالکینو ادعاوې ردوي او ډاډه دي چې پروسه شفافه ده.
دغه ریاست وايي، د کار چټکتیا او زیاتو مراجعینو ته د رسېدنې لپاره یې کابل کې یو بل مرکز هم پرانیستی دی.
د بې اسناده موټر د ثبت د پروسې وخت دوه میاشتې ټاکل شوې او د راتلونکې جدي میاشتې تر لسمې پورې پای مومي، خو مراجعین وايي، روانه پروسه پڅه ده او د ثبت د پروسې موده دې وغځول شي.
