د امریکا متحده ایالتو لوی درستیز د یوه خبري کنفرانس پر مهال وویل، افغان امنیتي او دفاعي ځواکونه پياوړي دي او د طالبانو مخه نیولی شي.
په ورته وخت کې میل وايي، طالبان د نیمايي ولایتونو مرکزونو ته هم رسیدلي،خو په خبره یې باوري دی،چې افغان امنیتي ځواکونو د کابل په ګډون له دغو مرکزونو هم ساتنه کولی شي.
میلي زیاته کړه:«افغان امنیتي ځواکونه اوس خپل سرتیري پیاوړي کوي. د دې پیاوړي کولو یوه برخه د ولسوالیو پرېښودل،چې دوی غواړي د ولایتونو مرکزونو کابل ته راشي، ترڅو د خلکو ساتنه وکړي ځکه ګڼ شمېر نفوس همدې سیمو کې اوسېږي. افغان امنيتي ځواکونه همدا اوس کابل او د ولایتونو په مرکزونو کې خپل ځواکونه منسجم کوي.»
میلي وایي، که څه هم په افغانستان کې لا هر څه ختم شوي نه دي او اټکل کوي،چې ښایي دلته د روان جنګي فصل په اوږدو کې هر ډول سناریو پېښه شي،چې په هغه کې به د طالبانو بشپړ پوځي برلاسي، سوله ییز حل او د جنګسالارانو بیا راپورته کېدل شامل وي.
میلي زیاتوي:« له اختر وروسته به وګورو،چې د تاوتریخوالي کچه همداسې پاتې کېږي او که پورته ځي. د سوله ییز حل امکان هم شته، د طالبانو بشپړ پوځي برلاسي امکان هم شته، د سقوط او حتا د جنګسالارانو بیا راپورته کېدو سناریو هم امکان لري،خو موږ هر څه له نږدې څارو او لا هر څه پای ته نه دي رسیدلي.»
د مارک میلي ترڅنګ د امریکا دفاع وزیر لیوډ آسټن له افغانستان څخه د خپلو سرتېرو بشپړ وتلو ته په اشارې وویل، له هغه وروسته به یې پوځي هڅې د طالبانو پر وړاندې نه بلکې د ترهګرۍ پر وړاندې وي.
آسټن وایي، د افغانستان وضیعت له نږدې څاري،ترڅو دغه هېواد بیا د ترهګرو پر پټن ځای بدل نه شي او دوی ونه ګواښي.
لیوډ آسټن وايي:« زموږ راتلونکې پالیسي دا ده،چې د دې ډاډ ترلاسه کړو،چې د ترهګرۍ او تاوتریخوالي ګواښ بیا له افغانستان څخه راپیدا نه شي او موږ ونه ګواښي. موږ هلته خپل امکانات د دې لپاره پریږدو،چې د وضیعت څارنه وکړو او که ګواښ پیدا شو،همالته یې پر وړاندې مبارزه وکړو.»
دواړو پوځي مشرانو له طالبانو وغوښتل،چې پر خپلو کړو ژمنو دې عمل وکړي او ترهګرو ډلو ته دې له افغانستانه د کارونې اجازه نه ورکوي،ځکه په وینا یې دا چاره دوی ته مشروعیت ورکولی شي.
د مالوماتو له مخې، له افغانستان څخه د امریکایي سرتېرې وتل ۹۵ سلنه بشپړ شوي او ټاکل شوې ده،چې د اګست میاشتې تر پایه به دغه بهیر بشپړ شي.
