وړمه ورځ د هلمند ولایت مرکز لښکرګاه ښار په بولان سیمه کې د پنبې په یوې فابریکې کې اورلګېدنې، میلیونونه افغانۍ مالي زیان اړولی دی.
د هلمند امنیه قوماندانۍ مسوولین وایې، اورلګېدنه دوشنبه غرمه مهال د بې احتیاطۍ له امله رامنځته شوې وه چې په دې پېښه کې شاوخوا ۴۳ میلیونه او ۴۰۰ زره افغانۍ مالي زیان اوښتی.
د هلمند امنیه قوماندانۍ ویاند نصیر احمد مهاجر وايي: « غرمه مهال زموږ د یوه هېوادوال په فابریکه کې اورلګېدنه رامنځته شوې وه چې د هلمند امنیه قوماندانۍ د اور وژنې ټیم په وخت اقدام سره اور مهار شو. په دې اورلګېدنه کې د شاوخوا ۴۳ میلیونه افغانیو په ارزښت مالي زیان رسېدلی، خو د مسوولینو د چټک غبرګون په پایله کې د سلګونه میلیونه نور زیان مخنیوی شوی.»
په دې اورلګېدنه کې تر ډېره هغه پنبه سوځېدلې ده چې چین ته د صادرېدو لپاره چمتو شوې وه.
د یادې فابریکې د مسوولینو په خبره، ټول شته یې د اور خوراک شوي او له حکومته د مرستې غوښتنه کوي.
زیانمن شوی محمدابراهیم شېرزاد وايي: « شاوخوا ۴۳ میلیونه افغانۍ زیان اوښتی. دلته زموږ ډېر مال راټول و؛ ځکه د پاکستان لارې بندې دي او موږ غوښتل چین ته یې صادره کړو، خو دا پېښه وشوه.»
زیانمن شوی سیدالرحمن وايي: « کره معلومات نه شته، خو دومره ویلی شم چې تر ۴۰ میلیونه افغانیو مالونه دلته پراته وو. له دولت غوښتنه کوو چې زموږ لاسنیوی وکړي، ترڅو خپل کار بېرته پيل کړو.»
بله خوا، د هلمند یوشمېر نور پانګوال هم له حکومته غواړي چې د یادو زیانمنو پانګوالو سره مرسته وکړي.
دوی همدا راز غوښتنه کوي چې د بولان صنعتي ښارګوټي کې دې د اطفایې مرکز فعال شي، ترڅو د پېښو په وخت کې د ډېر زیان مخنیوی وشي.
د هلمند پانګوال نقیب الله وايي: « لکه څرنګه چې نورو ولایتونو کې د پېښو قرباني شویو کسانو سره مرستې وشوې، موږ غواړو چې د هلمندوالو سره هم مرسته وشي.»
پانګوال عبدالودود وايي: « له دولت او ملي سوداګرو غوښتنه کوو چې په ګډه د دې خلکو مرسته وکړي، ترڅو یې کاروبار بېرته برابر شي.»
که څه هم د بولان په صنعتي ښارګوټي کې لګېدلی اور ژر مهار شوی، خو خلک په ورته سیمو کې له وړاندې د حکومت له خوا د وسایلو د ځای په ځای کولو غوښتنه کوي.
