وېسټ له جاپاني چارواکو سره د افغانستان په اړه خبرې کړي 

وېسټ پرون د جاپان پلازمینې توکیو ته رسیدلی او هلته یې  د افغانستان لپاره د دغه هېواد سفیر او نورو چارواکو سره لېده کاته کړي.

وېسټ زیاته کړې:«د  جاپان بهرنیو چارو له وزیر سره مې په افغانستان کې د بشري مرستو، بشري حقونو او سیاسي ډیالوګ په اړه خبرې وکړې. له سفیر تادامیچي یاماموتو څخه مې د افغانستان په اړه ګټورې مشورې ترلاسه کړې.»

وېسټ پر خپل ټویټر پاڼه لیکلي،چې امریکا او جاپان په افغانستان کې ګډې موخې لري او

ګډ کار به وکولی شي،چې دواړه هېوادونه په افغانستان کې بریالي کړي.

دغه راز وېسټ هېله ښودلې ده،چې د افغانستان په چارو کې د جاپان ونډې او تجربو ته اړتیا لري.

هغه زیاته کړې:« کله چې موږ له خپلو متحدینو سره پر ګډه کار کوو، د هر ډول ستونزې پر وړاندې پیاوړي یوو. په افغانستان کې دا حقیقت دی. موږ به د  افغانستان لپاره د جاپان تجربو او ونډې ته اړتیا ولرو.»

د تل په څېر د جاپان او امریکا ترمنځ ناسته کې افغانستان کې د بشري حقونو، بشري ناورین او سیاسي ډیالوګ یادونه داسې مهال کیږي،چې اسلامي امارت ځان بشري حقونو ته ژمن بولي، بشري ناورین میراث یادوي او پر کوردننه یې د سیاسي ډیالوګ خبره هیڅکله نه ده کړې.

د توماس وېسټ دا سفر د روانې ډسمبر میاشتې پر لومړۍ پیل شوی او ټاکل شوې ده،چې د همدې میاشتې تر اتمې نیټې دوام وکړي،چې په لړ کې به یې هند او متحده عرب اماراتو ته هم لاړ شي.