په لوېدیځو ولایت کې خبريالان د رسنيو کمزوری اقتصاد او د يو شمېر خصوصي او دولتي ادارو له لوري ورسره په ټاکلي وخت د معلوماتو نه شريکول، د خپلو فعاليتونو پر وړاندې بنسټيز خنډ بولي.
دوی له سرپرست حکومته غواړي، چې د رسنیو اقتصادي ستونزې هوارې کړي.
هرات ولایت کې یو خبریال نذیر احمد هاشمي وايي: « ستونزه دا ده،چې دولتي چارواکي ځواب نه راکوي، دولت باید له دوی سره همغږي وکړي ترڅو خبریالانو ته په وخت معلومات ورکړي.»
هرات ولایت کې یو بل خبریال احمد سمیع احمدي بیا وايي: « اکثریت دولتي ادارې ځواب ویونکې نه دي او دغه کار د دې سبب شوی چې خبریال په هغه دنده کې پاتې راشي چې ورسپارل شوې ده.»
د یو شمېر چاپي رسنیو مسوولین بیا ټولنه کې د خواله رسنيو زیاتوالی او د خلکو ترمنځ د چاپي رسنیو لوستلو دود نه شتون، چاپي رسنیو ته د لېوالتیا کمېدو لاملونه یادوي.
په هرات کې د اتفاق ورځپاڼې مسوول فایق هروي وايي: « د ورځپاڼو لوستل هغسې چې ښايي نه دي دود شوي. له بلې خوا د ټکنالوژۍ پرمختګ او دغه راز انټرنېټ او خواله رسنیو ته د خلکو لاسرسی لامل شوي چې د ورځپاڼو لوستلو لپاره لېوالتیا کمه شي. دغه چاره د هرات په شان ښار او د افغانستان په څېر فرهنګي هېواد لپاره د اندېښنې وړ خبره ده.»
کارپوهان هم د رسنیو او خبریالانو اوسنی وضعیت د اندېښنې وړ بولي او ټینګار کوي، چې دولت دې د رسنیو او خبریالانو د فزیکي امنیت ترڅنګ اقتصادي او تخنیکي امنیت هم برابر کړي.
د پوهنتون استاد نعمتالله سروري وایي: « افغان خبریالان کله هم له مالي پلوه نه دي هڅول شوي. په تېرو ۲۰ کلونو کې دولت هسې په خوله ویل، چې د خبریالانو ملاتړ کوي،خو دا خبره یوازې د کاغذ پرمخ وه او په عمل کې له خبریالانو هېڅ ډول ملاتړ نه دی شوی.»
له دې ټولو سره سره، چارواکي له رسنیو او خبریالانو څخه د ملاتړ ډاډ ورکوي او ټینګار کوي، چې د دیني او ملي ارزښتونو په چوکاټ کې د رسنیو ستونزو حل ته ژمن دي.
د اطلاعاتو او فرهنګ وزارت د خپرونو مرستیال حیات الله مهاجر فراهي وايي: « اسلامي امارت د مطبوعاتو او رسنیو په برخه کې له هر هغه څه سره همکار دی، چې زموږ له اسلامي او ملي ارزښتونو سره سمون ولري، په ځانګړې توګه د چاپي رسنیو په برخه کې.»
دا په داسي حال کې ده، چې د لوېدیځ زون په ټولو ولایتونو هرات، غور، بادغیس، فراه او نیمروز کې دا مهال شاوخوا ۶۰ انځوریزې، غږیزې او چاپي رسنۍ فعالیت لري، چې په کې ګڼ شمېر نارینه او ښځینه خبریالان پر کار بوخت دي.
