د دولتي ادارو د یوکلنو لاسته راوړنو د تشرېح په لړ کې د سې شنبې پر ورځ ملي دفاع وزارت د خپلو یو کلنو لاسته راوړنو راپور وړاندې کړ.
د اسلامي امارت د وسله وال پوځ لوی درستیز فصح الدین فطرت د راپور وړاندې کولو پرمهال خبرداری ورکړ او زیاته کړه چې وسله واله پوځ د ځمکنۍ بشپړتیا او د هېواد د معنوي ارزښتونو ساتنې لپار چمتو دی او هېڅ یرغل به تحمل نه کړي او نه به هم ګواښ بې ځوابه پرېږدي.
فطرت په دې اړه وايي: « ملي دفاع وزارت د خدای په مرسته او د شته امکاناتو په کارولو او ستاسو با غیرته ملت په ملتیا، ژمنه کوي چې هېڅ ډول ګواښ به بې ځوابه نه پرېږدي او هېڅ ډول یرغل تحمل نه کړي. موږ له ټولو خلکو، متنفذینو، ځوانانو، علماوو، محصلینو، سوداګرو او رسنیو غوښتنه لرو چې د ملي یووالي د ټینګښت، د امنیت منلو ترویج او د خپلې خاورې د ساتنې لپاره د امنیتي ځواکونو تر شا ودرېږي؛ ځکه چې له اسلامي نظام ملاتړ د هر مؤمن او آزاد افغان دنده ده.»
فطرت زیاته کړه چې په تېر یوه کال کې څه باندې ۹۶۴ زره اوپراسوني فعالیتونه ترسره شوي چې امنیت، ګزمه، کمین، چک پاینټ او تلاشیانې په کې شامل دي او په پایله کې یې سلګونه عرادې موټر او موټرسایکلونو ترڅنګ، سيکې او درنې وسلې، چاودېدونکي او نشه يي توکي ترلاسه شوي دي.
د ملي دفاع وزارت لوی درستیز وايي: « د دغو فعالیتونو په پایله کې ۳۱۰ عرادي مختلف النوع وسایط، ۴۷۷ میله سپکې وسلې، ۶۸ میله درنې وسلې، ۳۷۱ کړۍ ماینونه، ۵۳ پایې مخابرې، ۴۸۱ قاب دربینونه، ۳۰۲ عرادې موټرسایکل، ۹۲ کیلوګرامه چاودېدونکي توکي، ۱۲۸ قبضه لاسي بمونه، ۵ زره ۷۲۲.۹۳۴ کیلوګرامه نشه يي توکي، ۷۰۵ کیلوګرامه اومان، ۴ زره ۳۸۳ دانې ټابېلټ که، ۱۶۲ لیټر الکولي څښاک او د پام وړ اندازه مهمات ترلاسه شوي دي.»
د دفاع وزارت چارواکي دغه راز وايي، په دې وزارت کې د جنرالۍ تر بستونو ګڼ شمېر ګومارنې هم شوې دي او د یوه کال په موده کې سلګونه کسان چې د خدمت موده یې پوره شوې وه، تقاعد ته سوق شوي دي.
د ملي دفاع وزارت د سټراټیژۍ او پالیسۍ مرستیال هغه ګونګوسې هم رد کړې چې وايي، پخواني مسلکي کسان په سیسټماټیک ډول له دې وزارته حذفېږي.
د ملي دفاع وزارت د سټراټیژۍ او پالیسۍ مرستیال مولوي محمد قاسم فرید وايي: « د ملي اسلامي اردو شاوخوا ۹۵ زره تنو منسوبینو ګومارنه او بیا ګومارنه ترسره شوې او له امله یې په سوق او اداره او دندو ترسره کولو کې ښه والی رامنځته شوی. له منظور شوي تشکیل سره سم، په جنرالۍ بستونو کې د ۱۳۲ تنو مسوولینو ګومارنه او بیا ګومارنه ترسره شوي. د نظامي او مسلکي، تعلیمي او تحصیلي موسسو ۲۱۲ تنه فارغان تثبیت او رتبه شوي دي. تر معلومې مودې خدمت کولو وروسته ۳۰۸ تنه منصبداران او بریدملان تقاعد شوي دي.»
په همدې حال کې د اسلامي امارت د وسله وال پوځ لوی درستیز وايي، داعش د تبلغاتي جګړې او د خلکو ذهنیتونو د پرېښانه کولو لپاره جوړه شوې پروژه ده چې په افغانستان کې یې پاتې بقایا هم له منځه تللې.
فطرت په دې اړه وايي: « داعش خپله د تبلیغاتي او رواني جګړې یوه پروژه ده او له تبلیغاتو ها خوا څه نه ده. دا چې ویل کېږي افغانستان کې داعش ډله یا بهرني تروریستي ډلې دي، دا تبلیغاتي جګړه او د افغانستان د اسلامي امارت پر ضد تبلیغ دی او غواړي د خلکو ذهنتونه مغشوش کړي.»
ملي دفاع وزارت د خپل کلني راپور وړاندې کولو پرمهال وویل، په تېر یوه کال کې ۷ اېم.آی ۱۷ چورلکې او یوه هم اېم. آی ۳۲ الوتکه ترمیم شوې چې پرواز ته چمتو دي اوهوايي ځواک یې په دې موده کې له ۶ زرو ۳۰۰ زیاتې وظیفوي او تعلیمي الوتنې ترسره کړې دي.
د دې زوارت چارواکي زیاتوي، د هېواد ټول سرحدونه په سمه توګه تر کنټرول لاندې دي او د پولو ساتنې لپاره د ډیورنډ فرضي کرښې ترڅنګ له نورو هېوادونو سره پر ګډ سرحد ۱۵ سرحدي لواګانې، ۹۳ کنډکونه او ۷۶۵ پوستې ځای پرځای شوي دي.
چارواکي وايي، ګڼ شمېر هېوادونو ته یې نظامي اتشې استولي دي او هڅې روانې دي چې پاتې هېوادونو ته هم خپلې نظامي اتشې ولېږي.
د ملي دفاع وزارت په کلني راپور کې دغه راز راغلي، تر ۸۷ سلنه ورکړل شوې بودېجه یې هم مصرف کړې او ۲۴ معیوبو کسانو ته یې مصنوعي غړي ورجوړ کړي او د ۳۰ نورو لپاره کار روان دی.
د ملي دفاع وزارت چارواکي وايي، په تېر کال کې له ټولو ګاونډیو هېوادونو ایران، پاکستان، تاجیکستان، ترکمنستان، اوزبېکستان او چین سره پر ګډه د همغږۍ ۱۸ مرکزونه جوړ شوي چې ۷ یې فعال دي او پر نورو کار روان دی.
