امریکا متحده ایالت او اروپا یو شمېر هېوادونو ټینګار کړی چې د طالبانو راتلونکو کړنو ته په تمه دي، چې څومره کولای شي له نړیوالو اصولو سره سم چلن وکړي.
د سپینې ماڼۍ د مطبوعاتو مسووله جین ساکي وايي، کابل کې هرڅه لنډمهالي دي او همدا لامل دی چې نړیوال په ډاډه زړه خپل دریځ نه شي څرګنډ کولای.
ساکي زیاتوي: «تر هرڅه لومړی باید دا ووایم چې زموږ ادارې، ولسمشر، او په امنیت شورا کې هیچا تر اوسه پورې د طالبانو په اړه څرګنده پریکړه نه ده کړې. موږ دا هم نه وایو چې طالبان د باور، ارزښت او احترام وړ دي. تر اوسه پورې خبره دا ده چې د هغوی کابینه لنډمهاله ده. موږ هم تر اوسه پورې دا اداره په رسمیت نده پیژندلې.»
