محمد نسیم د ننګرهار ولایت د چپرهار ولسوالۍ اوسېدونکی دی. دی وايي، بهرنیو ځواکونو په دې تور نیولی و چې ګنې د دوی خلاف يې فعالیتونه کول او پنځه کاله یې په ګونتانامو زندان بندي کړ.
محمد نسیم وايي، د جرم له اثبات پرته يې پنځه کاله په ګوانتنامو زندان کې له سختو شکنجو سره تېر کړي.
نوموړی زیاتوي: « په زندان کې زولنې له چت څخه ځوړند وې او بندیان به یې په کې وتړل. ډېر داسې کسان وو چې لس تر پنځلسو ان شلو ورځو به را ځوړند وو. که کوم زنداني به تشناب ته د تللو وویل، دوو سرتېرو به تر مټو ونیو او تر تشناب به یې کش کاوه.»
د محمد نسيم په خبره، له ګوانتنامو څخه د خوشي کېدو پرمهال د کابل په هوايي ډګر کې خپلې کورنۍ له دې کبله نه پېژانده چې په څو کلونو کې د سختيو تېرولو له امله یې څېره بدله شوې وه.
نوموړی وايي، په زندان کې د سختيو تېرولو له امله اوس په رواني ناروغيو اخته شوی دی.
د ګوانتانامو دغه پخواني زنداني وايي: « زه چې هرځای کېنم، زړه مې تنګېږي او غواړم له هغه ځایه وتښتم؛ خوب نه راځي او د زندان ترخې ورځې مې ذهن کې ګرځي.»
محمد نسیم له ناڅرګند آدرس پوښتنه کوي چې ولې له جرم پرته شکنجه شوی او په ګوانتنامو کې د زندان پر ورځو شپو سربېره، اوس هم له رواني پلوه آرام نه دی؟
محمد نسیم وايي: « زه ولې پنځه کاله بندي وم او پر ما مو کوم جرم ثابت کړ؟ په افغانستان کې هم زندان، محکمه او قاضیان وو، زه افغان وګړی وم نه د کیوبا چې هلته مې بندي کړي.»
د ګوانتانامو دغه پخوانی زنداني د بشري حقونو له مدافع بنسټونو غواړي چې په ناحقه د زنداني کېدو په تړاو دې له بهرنيو ځواکونو ورته عدالت وغواړي او قانعت دې ورکړل شي چې ولې ربړول شوی دی؟
