Skip to content
د دوشنبې له سهار راهیسې بغلان او کندز ولایتونو پرته په ټول افغانستان کې ورښتونه پيل شوي،چې د باران او واورې کچه له ۱۵ تر ۵۰ ملي مترو رسیږي.
د هوا پیژندنې ملي ادارې په همدې تړاو یوه خبرپاڼه کې خبرداری ورکړی، ښایي تازه ورښتونه په ګڼو ولایتونو کې د سیلابونو د راوتو لامل هم شي.
له دې سره د ټولګټو چارو وزارت موندنې ښیي، چې د پلازمینې کابل په ګډون په ۱۲ ولایتونو کې که څه هم واورې وریږي،خو لارې یې د ترافیکو پر مخه پرانیستې دي.
هغه ولایتونه چې لارې یې پرانیستې دي:«کابل، غزني، لوګر، میدان وردګ، پروان، پنجشیر، اروزګان، دایکنډي، پکتیا، زابل، پکتیکا، او کاپیسا ولایتونو کې د واورې ورښت دوام لري،خو ټولې لارې د ترافیکو پر مخ د تګ راتګ لپاره پرانیستې دي.»
اخوا د تازه پرلپسې ورښتونو له امله د سالنګونو د لویې لارې په ګډون په ګڼو ولایتونو کې مواصلاتي لاري تړل شوي او د لویو لارو مسافر په لارو کې بند پاتې دي.
په دغو ولایتونو کې ځایي مسوولین وایي،هڅې یې پیل کړي او پر وینا یې، بندې لارې به ژر پرانیزي.
له دې مخکې د سالنګونود ساتنې او څارنې ادارې د دغې لویې لارې د بندیدو ترڅنګ ویلي وو،چې د تېرو درې ورځې راهیسې په کې سخت توپان لګیږي او اټکل یې کړی، چې څو ورځې به نور هم دوام پیدا کوي.
هغه ولایتونه چې لارې په کې تړل شوي دي:« بامیان ولایت: د شاطو کوتل، پنجاب-آبقول، کرمان او روس مسیرونه او د حاجيګک کوتل تړلي دي.غور ولایت: غور-هرات، غور- کابل، د غوک او بایان بند کوتلونه تړلي دي. پروان ولایت: د سالنګ لویه لاره د بار وړونکو موټرو پر مخ تړلې،خو ځنځیر لرونکي موټر پرې تګ راتګ کولای شي.هلمند ولایت: هلمند کې د هرات- کندهار لویه لار تړلې ده.»
پېښو ته د رسېدنې په چارو کې د دولت وزارت مرستیال مولوي شرف الدین:« په ۳۲ ولایتونو کې اورښتونه پيل شوي دي. هغه مالوماتو چې موږ ته رسېدلي، خلکو ته مالي او ځاني زیان نه دی اوښتی.»
د ټولګټو وزارت په یوه خبرپاڼه کې ویلي،د بندو لارو د بیا پرانېستو لپاره پوره چمتووالی لري او زیاتوي چې،د هوا ښه کېدو سره سم به لاس په کار شي او تړلې لارې به بېرته پرانیزي.
له دې سره اټکل کیږي،چې ښایي په هرات او نیمروز ولایتو کې د سختو بارانونو له امله سېلابونوه هم راووځي.
