له پېښو سره مبارزې ته د چمتووالي ملي اداره کې د کابل ولایت له ۱۴ولسوالیو راغلو استازو د خپلو سیمو هغه ستونزې له مسوولینو سره شریکې کړې چې د طبیعي پېښو له امله ځپل شوې او یا یې خطر موجود دی.
د یادې ادارې مسوولین وایي، د اسلامي امارت د مشرتابه له سپارښتنو سره سم هڅه کوي چې په ټول هېواد کې د خلکو ستونزو ته د رسېدنې په موخه دغه شان غونډې ترسره او ستونزو ته رسېدنه وکړي.
له پېښو سره مبارزې ته د چمتو والي ملي ادارې ویاند ملا جانان ثایق وايي: « دا غونډه د دې لپاره راغوښتل شوې چې موږ باید په ټولو ولایتونو وقایوي پروژې پلې کړو؛ د دې لپاره باید خلک را وغواړو او ستونزې یې واورو. له همدې امله مو نن د کابل والي په ګډون د ۱۴ ولسوالیو استازي راغوښتي وو او د هغوی ستونزې او غوښتنې مو واورېدې. دا غوښتنې به د اسلامي امارت له رهبر او رییس الوزرا سره شریکې کړو. همدارنګه دا غوښتنې به له موسسو سره هم شریکو او پر ګډه به د خلکو ستونزې هواروو.»
غونډې ته له ولسوالیو راغلو استازو وویل، تېر کال طبیعي پېښو کابل کې د بزګرو او بڼوالو له ځپلو سربېره ډېری کورنۍ بېځایه کېدو ته اړې کړې.
دوی غوښتنه وکړه چې د همغږۍ لپاره دې ځانګړی کمېسیون جوړ شي، ترڅو د طبیعي پېښو پر وړاندې له مخکې تدابیر ونیول شي.
د استالف ولسوالۍ استازي باباجان وویل: « د استالف سیند دواړو غاړو ته د خلکو کورونه او باغونه دي او استنادي دېوال ته اړتیا لري. له پېښو سره مبارزې ته د چمتوالي ملي ادارې غواړو چې خپلو امکاناتو ته په کتو، پاملرنه وکړي.»
د بګرامیو ولسوالۍ استازی ګل محمد وویل: « ښه خبره دا ده چې د پښو له کېدو وړاندې د هغوی مخنیوی وکړو. د کابل بګرامیو ولسوالۍ کې د سبزیو نیمايي هغه فصلونه سېلاب یوړل چې د همدې ښار خلک ترې ګټه اخلي.»
بله خوا، د یادې ادارې چارواکي او یوشمېر نور مسوولین له کابل ښار سربېره په ټولو ولایتونو کې د طبیعي پېښو پر وړاندې زیانمنو شویو ته د اړتیا وړ توکو د مرستې رسونې خبره کوي او وایي، د بودیجې د کمښت له امله نه شي کولی ټولو ستونزو ته رسېدنه وکړي.
دوی زیاتوي، د بهرنیو موسسو له لوري په ولسوالیو کې د خوراکي توکو د وېش په ځای به د کاري فرصتونو په برابرولو سره د هغو استنادي دېوالونو د جوړلو چارې پیل کړي چې خلک د سېلابونو له خطر ژوغورلی شي.
له پېښو سره مبارزې ته د چمتو والي ملي ادارې سرپرست ملا نورالدین ترابي وايي: « داسې نه شو ویلی چې دا ټول کارونه به موږ کوو؛ ځکه ۳۴ ولایتونو کې څه د پاسه ۴۰۰ ولسوالۍ دي. موږ به له خپل وس سره سم مرستې کوو او موسسې به هم وهڅوو چې د خوراکي موادو پر ځای دغو کارونو ته لومړیتوب ورکړي.»
د کابل والي مولوي امین الله عبید وايي: « ستاسو چې کومې ستونزې او غوښتنې دي، موږ له ځانه سره نوټ کړې. د طبیعي پېښو د خطرونو مخنیوي لپاره به موږ نورې سکټوري ادارې هم د پېښو له ادارې سره مل کړو.»
له پېښو سره د مبارزې او چمتو والي ملي ادارې له لوري د همغږۍ دغه ناسته داسې مهال جوړېږي چې د مالوماتو له مخې، په تېر ۲۰۲۴ زېږدیز کال کې د طبيعي پېښو له امله ۳۵۰ کسان مړه او۵۰۰ نور ژوبل شوي؛ همدارنګه ۴ زره بابه کورونه ویجاړ او ۷۰ زره جریبه کرنیزه ځمکه له منځه تللې ده.
