پاکستان له جوړېدو راهیسې د افغانستان په کاواکۍ او ناامنۍ امنۍ کې خپله بقا ليدلې او د دې هدف لپاره يې تل په خپل لاس روزلې ترهګري وسيله ګرځولې ده.
شنونکي په دې باور دي چې پاکستان اوس د افغانستان په بېثباتۍ کې د پردې ترشا د لسيزو رول لوبولو برعکس، له ترهګرۍ د ابزاري استفادې ترڅنګ له افغانستان سره مخامخ جګړې ته وتلی او ملکي اهداف يې نښه ګرځولي.
د دوی تحلیل دا دی چې پاکستان غواړی پر افغانستان له بریدونو سره له یوې خوا د خپلو ځواکونو ناکامي پټه کړي او له بلې خوا په افغانستان کې د یوه ځواکمن مرکزي نظام جوړېدو مخه ونيسي.
د سیاسي چارو شنونکی کمال ناصر اصولي وايي: « پاکستان په فعلي حالت کې هم د تېر په څېر د یوه مقتدر قوي دولت د جوړېدو مخه نیسي. دوی کوشش کوي چې د خپلو جاسوسانو او نا اهله وطن پلورونکو په وسیله چلنجونه ایجاد کړي. دلته دوې مسئلې دي؛ یوه د دوی خپله ناکامي ده چې غواړي په افغانستان کې په بریدونو یې پټه کړي، دویمه دا چې دوی هېڅکله نه غواړي افغانستان کې مقتدر نظام جوړ شي بلکې دلته یو ضعیف دولت وي او نه شي کولی د افغانستان فعلي جغرافیه خوندي کړي.»
د چارو شنونکي دغه راز وايي، پاکستان تل د افغانستان ثبات او امنیت ته زیان رسولی او اوس یې له افغانانو سره بربنډه دښمني پیل کړې، بریدونه کوي او عام خلک شهیدانوي. دوی وړانديز کوي چې د پاکستان ورته بريدونو ته دې کلک ځواب ورکړل شي.
د پوهنتون استاد فیض محمد ځلاند وايي: « پاکستان تل د یوه ناوړه او بدمرغه ګاونډي په توګه په افغانستان کې نا امنیو، بې ثباتیو او کاواکیو ته کار ویلی او لار یې ورته جوړه کړې. افغانانو ته په کار ده چې پاکستان ته په یوه خوله او اتحاد سره کلک ځواب ورکړي.»
ځينې نور شنونکي د پاکستان د دسيسو ناکامولو لپاره د افغانانو يووالی حياتي بولي او له حکومت هم غواړي چې دې هدف ته د رسېدود لپاره باید د افغانانو غوښتنې ومني.
د سیاسي چارو شنونکی توریالی ځاځی وايي: « ولې امریکا، ملګري ملتونه او بریټانیا چې تل یې د پاکستان ملاتړ کړی، د دوی د دې جنایت غندنه نه کوي؟ موږ باید خپل ملي یووالی وساتو، د ولس غوښتنې ومنو او د پاکستان د دې استخباراتي جګړو او جنایتونو ټغر ور ټول کړو.»
د فبروري میاشتې په ۲۱مه او ۲۲مه د پاکستان پوځي رژيم یو ځل بیا د ټولو نړیوالو قوانینو خلاف د افغانستان پر خاوره بریدونه وکړل چې له امله یې ښځې او ماشومان شهیدان شول او اسلامي امارت يې په مناسب وخت کې د حساب شوي ځواب ګواښ کړی. د پاکستان پوځي رژيم دا عمل د جنايت بلل کېدو ترڅنګ، په کور دننه او بهر په پراخه کچه وغندل شو.
